भरतपुर : कांग्रेसका नेताहरूले पार्टी एकताको नारा लगाउँदै चितवनको भरतपुरमा सोमबार आयोजित दुई अलग–अलग कार्यक्रममा सभापति शेरबहादुर देउवा र पूर्वमहामन्त्री प्रकाशमान सिंहले अर्को खेमालाई आरोप–प्रत्यारोप लगाएका छन् ।
कांग्रेसको भ्रातृसंगठन नेपाल दलित संघ र शुभेच्छुक संस्था प्रजातन्त्रवादी प्राध्यापक संघले सोमबार प्रदेशस्तरीय छुट्टाछुट्टै कार्यक्रम आयोजना गरेको थियो । एकअर्कामा कट्टर आलोचक मानिएका सभापति शेरबहादुर देउवा र पूर्वमहामन्त्री प्रकाशमान सिंहले बेग्लाबेग्लै कार्यक्रममा प्रमुख अतिथि थिए । सभापति देउवा र नेता सिंहले गत वर्ष भएका तीनै तहका निर्वाचनमा कांग्रेसको पराजयको दोष एकअर्को पक्षलाई लगाउनमै समय खर्चिएका थिए ।
नेपाल दलित संघ चितवनले आयोजना गरेको दुईदिने प्रदेशस्तरीय भेलालाई सम्बोधन गर्दै पार्टीले भोगेको पराजयको पीडाको चर्चा गरेर एकताको खोजी गरे । पार्टीभित्रको अन्तर्घात नै मुख्य समस्या भएको उनीहरूले बताए । तैपनि, आफ्नो पक्षलाई जोगाएर अर्कोलाई दोष दिन भने दुवै पक्षले प्रयास गरेका थिए । बुधबार भरतपुरमा आयोजित दुई छुट्टाछुट्टै कार्यक्रममा सहभागी नेताले एकअर्कामाथि दोष थुपार्न भने पछि परेनन् ।
भेलालाई सम्बोधन गर्दै सभापति देउवाले टिकट नपाउने र टिकट पाएर हारेकाहरूले आफूलाई दोष दिएको भनेर आपत्ति जनाए । आफूलाई दोष दिन छाडेर आफ्नो पराजयको कारण खोज्न सुझाव दिए । सभापति देउवाले पार्टीभित्रको अन्तर्घातले पार्टी पराजित बनेको स्पष्ट पारे ।
दलित संघको कार्यक्रममा बोल्ने नेताहरूले पार्टीको कमजोरीको खोजी गरे । महामन्त्री डा. शशांक कोइरालाले पार्टीभित्रको अन्तरविरोधले पार्टी सकिँदै गएको भन्दै चिन्ता व्यक्त गरे ।
सहमहामन्त्री डा. प्रकाशशरण महतले भने पार्टी सभापतिको खुलेरै बचाउ गरे । उनले नेतृत्वलाई निन्दा गरेर पार्टी बलियो नहुने बताए । आन्तरिक द्वन्द्वका कारण आफ्नैले भोट नहालेर पराजित भएको उनको भनाइ थियो ।
कांग्रेस नेता एवं पूर्वमहामन्त्री प्रकाशमान सिंहले भने पार्टीभित्रको गुटको राजनीति गरेको भन्दै सभापति शेरबहादुर देउवा नेतृत्वको कडा आलोचना गरे । प्रजातन्त्रवादी प्राध्यापक संघले आयोजना गरेको ३ नम्बर प्रदेशस्तरीय भेलालाई सम्बोधन गर्दै नेतृत्वले एकताको नारा गरेर गुट घुसाएको आरोप लगाए । चितवनमा सोमबार भएको प्रजातान्त्रिक प्राध्यापक संघ प्रदेश ३ को भेलामा सिंहले देउवाको आलोचना गर्दै भने, ‘एकताको नाटक गरेर आफ्नो गुट घुसाउने अनि एकताको नारा लगाउने ? ’ उनले पार्टीमा सही काम गर्ने र खुरापाती गर्ने एउटै मूल्यांकन भएको आरोप लगाए ।
प्रतिक्रिया दिनुहोस !
