परासी : पश्चिम नवलपरासीको सीमावर्ती नाका महेशपुरबाट संघीय प्रहरी इकाई कार्यालय भैरहवाको टोलीले मरिच बरामद गरेको छ । बुधबार राति महेशपुरबाट भारतको ठूठीबारीतर्फ लैजादै गरेको अवस्थामा एक क्विण्टल ७५ केजी मरिच भैरहवाबाट खटेको प्रहरी टोलीले बरामद गरेको हो ।
जिल्लाको सीमावर्ती नाकामा रहेका प्रहरी कार्यालयलाई अवैध सामान ओसारपसारबारे जानकारी दिएपनि वास्ता नगरेको भन्दै भैरहवाको टोलीलाई जानकारी गराएको स्थानीयले बताएका छन् । स्थानीयको जानकारीपछि आएको टोलीले आसोरपासरमा संलग्न व्यक्तिहरुले टाउकोमा बोकेर लैजादै गरेको अवस्थामा मरिच बरामद गरेको हो ।
बरामद गरेको मरिच २५ केजीका दरले सात वटा बोरामा रहेको प्रहरीले जनाएको छ । नेपालमा भन्दा भारतमा मरिचलगाएत मसलाजन्य वस्तुको भाउ महङ्गो भएका कारण अवैध रुपमा त्यसतर्फ जाने गरेको छ । नेपालमाभन्दा भारतमा मरिचप्रति केजी दुई सय रुपैयाँ बढी छ ।
केही दिनदेखि महेशपुरबाट सुपारी, सुक्मेल, मरिचलगायतका मसलाजन्य वस्तु भारतर्फ ओसारपसार हुने क्रम बढेको छ । त्यसैगरी महेशपुर नाकाबाटै भारतीय कपडाको अवैध कारोबारसमेत बढेको स्थानीयले बताएका छन् ।
पश्चिम नवलपरासीका प्रहरी प्रमुख प्रहरी उपरीक्षक राजेन्द्रप्रसाद भट्टले जिल्लाबाट सादा पोशाक(घुमुवा)का प्रहरी नखटाइएकाले रातको समयमा लुकिछिपी अवैध कारोबार बढेको जानकारी आएकाले नियन्त्रणका लागि मातहतका युनिटलाई सक्रिय रुपमा परिचालन गरिएको बताए ।
जनशक्ति कम भएका कारण भैरहवाबाट खटाइएका सादा पोशाकका प्रहरीले निगरानी बढाएको र जिल्लाको मातहतका युनिटको सम्पर्कमा रही अवैध सामान पक्राउ गर्ने गरिएको प्रहरी उपरीक्षक भट्टले बताए ।
प्रतिक्रिया दिनुहोस !
