बसले भ्यान र मोटरसाइकललाई ठक्कर दिँदा एकको मृत्यु, आठ घाइते
दमौली : आँबुखैरेनी गाउँपालिका-२ बरादीमा यात्रुवाहक बसले दुई सवारी साधनलाई ठक्कर दिँदा एकजनाको मृत्यु भएको छ भने आठ घाइते भएका छन्। आँबु-४ निवासी २६ वर्षीय डिलबहादुर थापाको उपचारका क्रममा दमौली अस्पतालमा ज्यान गएको प्रहरी जनाएको छ।
घटनामा परी आठ घाइते भएका छन्। घाइतेमध्ये दुई बेहोस छन्।पृथ्वीराजमार्गमा भएको दुर्घटनामा आँबुखैरेनीबाट डुम्रे आउँदै गरेको ग १ ख ३०७३ नम्बरको बसले डुम्रेबाट आँबुखैरेनी जाँदै गरेका बा १७ च १८१४ नम्बरको भ्यान र ग ५ प १९४४ नम्बरको मोटरसाइकललाई ठक्कर दिएको इलाका प्रहरी कार्यालय आँबुखैरेनीका निरीक्षक सन्तोष रोकाले बताए।
दुर्घटनामा परी घाइते हुने सबै भ्यान र मोटरसाइकलका यात्रु हुन्। घाइते हुनेमा पर्वतकी २० वर्षीया पार्वती लामिछाने र उनकी तीन वर्षीया छोरी ममता, चितवन भरतपुर ६ निवासी २० वर्षीया सरु पठक, पर्वत कुश्मा १३ निवासी २४ वर्षीय गुरुदत्त तिवारी तथा पर्वत कुश्मा ९ का २५ वर्षीय कमल लामिछाने छन्।
यसैगरी पर्वत खुर्कोटकी ३९ वर्षीया सीतादेवी चालिसे र नवलपरासी सुस्ताका ३५ वर्षीय आनन्त तिवारी पनि घटनामा घाइते भएका छन्।अर्का एक घाइतेको परिचय खुलेको छैन।घाइतेमध्ये पर्वतकी तीन वर्षीया ममता र पर्वत कुश्माका कमल बेहोस छन्।
थापाको दमौली र बाँकी दुईको गण्डकी मेडिकल कलेजमा उपचार भैरहेको प्रहरीले जनाएको छ। एकै पटक तीन सवारी ठोकिंदा केहीबेर राजमार्ग अवरुद्ध भएको थियो। अवरुद्ध राजमार्ग प्रहरीले खुलाएको छ।