बेंसीसहर : मनाङको नेस्याङ गाउँपालिकाको पिसाङ खोलामा पुल नहुँदा सवारीसाधन आवातजावतमा मनाङवासीले सधैँ सास्ती भोग्नुपरेको छ । हिउँदमा खोला घटेर बाटो सहज भए पनि बर्खामा खोलामा भेल आउने हुँदा सवारीसाधन ओहोरदोहोर गर्न बाधा पुग्ने गरेको छ ।
मनाङको बाटो आफैंमा कठिन छ, त्यसमा पनि ठाउँ–ठाउँमा भएका खहरे खोलामा पक्की पुल नहुनु र भएका काठका पुल पनि बगाउने समस्याले वर्षैपिच्छे यस्तो सास्ती झेल्नुपरेको छ ।
हिउँदमा बढी चिसो हुने हुँदा हिउँ जमेर खोला सुक्छन् र बाटो सहज हुन्छ । बर्खामा भने हिउँ पग्लिएर खोलामा बाढी आउने हुनाले बेंसीसहरबाट मनाङ आउने र मनाङबाट बेंसीसहर जाने यात्रु दिनैपिच्छे खोलाको किनारमा अड्किएर बस्नुपरेको छ ।
कहिले खोला घट्ला भनी खोला किनारमा सवारीचालक अलपत्र परेका हुन्छन् । कहिले ट्रयाक्टरको सहायतामा गाडी निकाल्छन् त कहिले पानी परेर चिसो भई हिउँ जमेर खोला सुक्ने पर्खाइमा रहन्छन् ।
नेपालकै महŒवपूर्ण पर्यटन क्षेत्रमा सहजै आवतजावत गर्न सक्ने बाटो नहुँदा यहाँ आउने पर्यटक ज्यादै कठिन यात्रा गर्न बाध्य छन् । यस्तो सास्ती कहिलेसम्म भोग्ने यहाँका जनता र पर्यटकले, स्थानीयले प्रश्न गरेका छन् । पिसाङका जिप चालक रामबहादुर गुरुङका अनुसार कतिपय सवारी बीचमै अड्किएर भोलिपल्ट खोलाको पानी कम भएपछि तार्नुपर्ने बाध्यता छ ।
काठमाडौंबाट मनाङ घुम्न आएका उमेश महर्जन मध्याह्नमा खोला उर्लिएर आउँदा दंग परे । उनले भने, ‘पानी नपरे पनि हिउँ पग्लिएर दिउँसै खोलामा बाढी आउँदोरहेछ ।’ पहिलोपटक मनाङ घुम्न पुगेका लमजुङ भोटेओडारका अशोक सापकोटाले पुल नहुँदा खोलामा दुःख पाइएको बताए । सवारी चालकका अनुसार खोलामा कतिबेला भेलबाढी आउँछ, पत्तै हुँदैन ।
पर्यटन व्यवसायी समिति मनाङका अध्यक्ष विनोद गुरुङले पुल नहुँदा मनाङ घुम्न आउने पर्यटक र स्थानीयलाई समस्या परेको बताए । डिभिजन सडक कार्यालय दमौलीले चालु आर्थिक वर्षमा मनाङका खोलामा बेलिब्रिज पुल बनाउने गरी योजना बनाइएको बताएको छ । केही खोलामा पुल निर्माण सुरुसमेत गरिएको डिभिजन सडक कार्यालयले जनाएको छ । तत्काल आवतजावतका लािग काठको पुल बनाइँदै गरिएको स्थानीयले बताएका छन् ।....
प्रतिक्रिया दिनुहोस !
