गोरखा : भारी वर्षासँगै पहिरो खसेपछि उत्तरी गोरखा जाने बाटो विभिन्न ठाउँमा अवरुद्ध भएको छ । सोतीदेखि जगतसम्मको पदमार्ग विभिन्न ठाउँमा अवरुद्ध भएको छ भने जिल्लाभरका ग्रामीण सडक पनि अवरुद्ध भएको स्थानीयले बताएका छन् ।
विशेषगरी नेपाली सेनाले निर्माण गर्दै गरेको सडक पहिरोले अवरुद्ध भएको स्थानीय सूर्य घलेले जानकारी दिए । ‘माछाखोला आसपासमा मात्रै १०÷१२ ठाउँमा पहिरो खसेको छ’, घलेले भने, ‘माछाखोला र खानीबेंशीको बीचमा २ ठाउँमा ठुल्ठूला पहिरा खसेका छन् ।’ माछाखोलादेखि माथि तातोपानीसम्म पनि तीन ठाउँमा ठूलो पहिरो खसेको छ । ‘तातोपानीदेखि खानीवेशीसम्म धेरै नै गाह्रो भएको छ’, उनले भने, ‘धेरै ठूला ढुंगा र रूखसहितै पहिरो खसेर बाटो छेकिएको छ ।’
नवनिर्मित सडकमा धेरै ढुंगा खसेर आवतजावत अवरुद्ध भएको घलेले बताए । कतिपय ठाउँमा बाटो नै पहिरिएर बूढीगण्डकीमा खसेको छ ।
सो सडक अवरुद्ध हुँदा साविकका गुम्दा, उहिया, केरौंजा, सिर्दिबास, चुम्चेत, छेकम्पार, बिही, प्रोक, ल्हो र सामागाउँबासी सदरमुकाम तथा अन्य सहरी क्षेत्रमा जानबाट वञ्चित हुने गर्छन् । खच्चडबाट खाद्यान्न तथा दैनिक उपभोग्य सामग्री ओसारपसारमा पनि समस्या हुने स्थानीय हर्क गुरुङले बताए ।
ग्रामीण यातायात बन्द
पानी पर्न थालेपछि जिल्लाका अधिकांश सडक अवरुद्ध हुन थालेका छन् । भच्चेक सडकमा चैते झरीका कारण गत चैत १४ गतेदेखि नै बस चल्न छाडेको यातायात व्यवसायी समिति गोरखाका महासचिव अञ्जनबाबु खत्रीले बताए । जिल्लाका आठ वटा ग्रामीण सडकलाई बर्खामा पनि गाडी गुड्न योग्य बनाउन जिल्ला विपद् व्यवस्थापन समितिले निर्देशन दिएको थियो । आकस्मिक विपद् परे तत्काल उद्धार तथा राहतका लागि र दैनिक जनजीवन सहज बनाउन लागिएको समितिका संयोजक प्रमुख जिल्ला अधिकारी नारायण भट्टराई बताउँछन् । तर, बर्सातपछि कुनै सडकमा पनि गाडी चल्ने अवस्था नरहेको स्थानीयको भनाइ छ ।
भच्चेक बजारसम्म बस जान छाडेको धेरै भएको त्यहाँका वडाध्यक्ष तयराज गुरुङ बताउँछन् । ‘जौबारीको चैनपुरमाथिको चार किलोमिटरमा गाडी गुडाउनै सकिँदैन’, गुरुङ भन्छन्, ‘सिरानचोक गाउँपालिकाले पनि मर्मत गरेन । हामी अजिरकोटले पनि आफ्नो क्षेत्रमा नपर्ने भएर गरिएन । त्यहाँ ठूलो समस्या छ ।’ खाल्डो र हिलोका कारण सो खण्ड अवरुद्ध भएको उनले बताए । ‘छोप्राकको तार्केडाँडामा पनि रोडमा खोलो बग्छ, गाडी गुड्दैन’, गुरुङले भने । सो सडक अवरुद्ध हुँदा भच्चेक सडक र आँपपीपल दूधपोखरी सडक अवरुद्ध हुने उनले बताए ।
बारपाक सडकमा पनि राङरुङसम्म मात्र बस चल्न सक्ने स्थानीय जितबहादुर घले बताउँछन् । ‘राङरुङभन्दा करिब एक किलोमिटरमाथि धेरै ठूलो ढुंगा खसेर सडक थुनेको छ’, घलेले भने, ‘माथिबाट अर्को ढुंगा फेरि झर्ने अवस्थामा छ । यति ठूलो ढुंगा छ कि, कि विस्फोट गराउनुपर्छ कि ब्रेकर लगाएर फुटाएर पन्छ्याउनुपर्छ ।’ मान्द्रेभन्दा केही तल पनि हिलो र खाल्डोले गाडी चल्न नसक्ने अवस्था गराएको उनले बताए । ‘राङरुङदेखि मान्द्रेसम्मको सडक जुनसुकै बेला अवरुद्ध हुन सक्ने अवस्था छ । त्यसैले एउटा एक्साभेटर तयारी अवस्थामा राख्नुपर्छ’, घलेले भने ।
आरुघाट सडकको ताप्लेदेखि झिँगटेसम्म पनि सडक बिग्रेर यातायात सञ्चालन गर्न नसकिएको यातायात व्यवसायी समितिका महासचिव खत्री बताउँछन् । सो बाटो अवरुद्ध हुँदा आरुघाट, आर्खेत, सोती सडक र घ्याम्पेशाल, सौरपानी सडक अवरुद्ध हुने उनले बताए ।
आरुघाट, आर्खेत सोती सडकको छेपारेखोलाखण्ड बाढीले बिगारेका कारण त्यसभन्दा माथि सवारीसाधन चल्न नसक्ने अवस्था रहेको स्थानीय हर्क गुरुङले बताए । जिल्ला विपद् व्यवस्थापन समितिले गोरखा आरुघाट सडक, गोरखा घ्याम्पेशाल सौरपानी सडक, गोरखा भच्चेक सडक, गोरखा आँपपीपल दूधपोखरी सडक, गोरखा फुजेल सडक र सोतीपुल तथा चनौटे पुललाई बर्खाको बेला पनि तयारी अवस्थामा राख्न निर्देशन दिएको हो । तर, चनौटे पुल र सोती पुल दुवै निर्माण सम्पन्न भएका छैनन् ।
गोरखामा ०५५ सालदेखि ग्रामीण सडक निर्माणको काम सुरु भएको हो । निर्माण गर्न थालिएको २० वर्ष बितिसक्दा पनि स्तरोन्नति नहुँदा बर्खालागेपछि ती सडकमा यातायातका साधन नचलेका हुन् ।
प्रतिक्रिया दिनुहोस !
