बेरुत : सिरियाली सरकारको मुख्य सहयोगी रूस र दक्षिण सिरियामा सक्रिय विद्रोही समूहबीच युद्धविरामका लागि सहमति भएपछि हजारौं नागरिक स्वदेश फर्किएको सिरियाली मानव अधिकारवादी संघसंस्थाले जनाएका छन् ।
सरकारी सेनाले रूसको सहयोगमा गत दुई सातादेखि गरेको कारबाहीमा झण्डै ५ सयजनाको मृत्यु भएको बेलायतस्थित सिरियाली मानवअधिकारवादी संस्थाले जनाएको छ । युद्धविराम सहमतिपछि विद्रोही दारा क्षेत्रबाट पछि हट्न सहमत भएका छन् । त्यस क्षेत्रबाट पछि हट्ने समयमा विलम्ब गर्दा दुई ठाउँमा भएका हवाई आक्रमणमा चार सर्वसाधारणको मृत्यु भएको छ । दक्षिण सिरियाका अन्य क्षेत्रमा अवस्था क्रमशः सामान्य बन्न थालेको मानवअधिकारवादी समूहले जनाएको छ ।
सिरियामा सात वर्ष पहिले चलेको गृहयुद्धसँगै विद्रोहीको नियन्त्रणमा रहेको दारा प्रान्तको जोर्डनसँगको सीमाक्षेत्र र इजरायलद्वारा नियन्त्रणमा लिएको गोलन हाइट्सलाई सिरियाले पुनः फिर्ता गर्ने प्रतिबद्धतासहित अघि बढेपछि अन्तर्राष्ट्रिय समुदायको दबावमा युद्धविराम गरिएको हो । जुन १९ पछि सरकारी फौजद्वारा गरेको व्यापक रूपमा गोलाबारी गर्न थालेपछि करिब तीन लाख २० हजार नागरिक विस्थापित बनेको राष्ट्रसंघको ठहर छ ।
उक्त क्षेत्रमा जोर्डनले सिरियाली आप्रवासी शरणार्थीको भार धान्न नसक्ने भन्दै प्रायः सबै नाका बन्द गरिदिएको छ । विद्रोही र सरकारी फौजबीच गत शुक्रबार युद्धविरामको सहमति भएको थियो । सहमतिअनुसार विद्रोहीले सरकारलाई ठूलाखाले हतियार बुझाउने र उक्त प्रदेशमा सरकारको उपस्थितिलाई स्वीकार गर्नुपर्ने बताइएको छ । शनिबार र आइतबार करिब ६० हजार सिरियाली नागरिक घर फर्केका छन् । युद्धविराम सहमति इस्लामिक स्टेट (आइएस) जिहादी समूहका लागि भने लागू हुनेछैन।
ट्युनिसियामा ५ सैनिक मारिए
अल्जेरियासँगको ट्युनिसियाली सीमा क्षेत्रमा आइतबार ‘आतंककारी आक्रमण’ भएको ट्युनिसियाली आन्तरिक मामिला मन्त्रालयले जनाएको छ । यसपहिलेको मृतक संख्यालाई अद्यावधिक गर्दै मन्त्रालयले भनेको छ, ‘ऐन सुल्तान क्षेत्रमा सीमा क्षेत्रको गस्तीमा तैनाथ सुरक्षा गार्डलाई लक्षित गरी जमिनमुनि बिछ्याइएको विद्युतीय धराप विस्फोट गराउँदा ५ जनाको मृत्यु भएको छ ।’ यसअघि उक्त घटनामा आठजनाको मृत्यु भएको मन्त्रालय स्रोतले जनाएको थियो ।
स्थानीय समयअनुसार बिहान ११ः४५ बजे भएको विस्फोटपछि आक्रमणकारीले सुरक्षाकर्मीमाथि गोलीसमेत चलाएको थियो । मन्त्रालयका प्रवक्ता जनरल सुफयान अल–जाकले आक्रमणलाई आतंककारी हमला भएको पनि यसको कसैले जिम्मेवारी नलिएको उनले स्पष्ट पारे । ट्युनिसियामा पर्यटनका लागि अनुकूल मौसममा उक्त आक्रमण भएको छ । सन् २०११ मा भएको सत्तासमीकरण पछि दर्जनौँ सुरक्षाकर्मी र ५९ पर्यटकले ज्यान गुमाएका छन् । सरकारले सन् २०१५ को नोभेम्बरदेखि यहाँ संकटकालको घोषणा गरेको थियो । एक विस्फोटमा राष्ट्रपतिका १२ जना सुरक्षा गार्डको निधन भएपछि संकटकाल घोषणा गरिएको थियो ।
एएफपी
प्रतिक्रिया दिनुहोस !
