गाउँसभा गर्न सकस
लहान : सिरहाका दुई स्थानीय तह नवराजपुर र औरही गाउँपालिकाले दोस्रो गाउँसभा गर्न सकेका छैनन् । स्थानीय तह सञ्चालन ऐनअनुसार असार १० गतेभित्र गाउँसभा गर्नुपर्ने हुन्छ । उक्त समयभित्र गर्न नसके १५ दिनभित्र अनिवार्य गाउँसभा गर्नुपर्ने व्यवस्था छ ।
कर्मचारी अभावका कारण गाउँसभा गर्न नसकिएको नवराजपुर गाउँपालिकाका अध्यक्ष विश्वमोहन यादवले बताए । कार्यकारी अधिकृत र सहलेखापालकै भरमा गाउँपालिका चलिरहेको उनको भनाइ छ । ‘दरबन्दीअनुसारको कर्मचारी पठाउन मन्त्रालयमा पत्राचार गरिए पनि हालसम्म सुनुवाइ भएको छैन’, उनले भने ।
गाउँसभाका लागि नवराजपुरमा योजना छनोटसमेत हुन सकेको छैन । चालू आर्थिक वर्षकै अधिकांश योजना पूरा हुन नसकेको र काम गरिसकेका उपभोक्ता समितिले भुक्तानी नपाएका कारण आगामी आवका योजना छनोट नगरिएको एक वडाध्यक्षले बताए । ‘यहाँका कार्यकारी अधिकृत ललनकुमार यादव अनुभवी नभएका कारण विकास निर्माणको काम ढिलो सुरु भयो’, उनले भने, ‘त्यसैले अहिले समस्या भएको छ ।’
पाँच वडा रहेको नवराजपुरमा आव २०७४÷७५ मा विकासतर्फ ११ करोड ७६ लाख बजेट छुट्याइएको थियो । अध्यक्ष यादवका अनुसार विकास निर्माण गर्न सयभन्दा बढी उपभोक्ता समिति छन् तर चालू आव सक्न लागे पनि अधिकांश काम अधुरै छन् । काम पूरा नहुँदा रकम निकासा नदिएको उनको भनाइ छ ।
औरही गाउँपालिकामा जनप्रतिनिधिबीच विवाद देखिएको छ । प्र्रहरी घेरामा पहिलो नगरसभा गरेका गाउँपालिका अध्यक्ष सिद्धार्थ यादवले विवादकै कारण दोस्रो नगरसभा गर्न नसकेका हुन् । उनी तत्कालीन माओवादी केन्द्रबाट निर्वाचित भएका थिए तर कांग्रेस र फोरम मिलेका कारण उनको पक्षमा बहुमत नपुग्ने जनाइएको छ । उनले आफूखुसी काम गरेका कारण फोरम र कांग्रेसबाट जितेका जनप्रतिनिधि असन्तुष्ट देखिएका छन् ।
अध्यक्ष यादव र कार्यकारी अधिकृत सुशील अधिकारीसँग सम्पर्क हुन सकेन । वडा नम्बर ५ का अध्यक्ष दिलीप यादवले गाउँसभा कहिले गर्ने भनेर अध्यक्ष मात्र जानकार रहेको प्रतिक्रिया दिए । भने, ‘वडा नम्बर ५ बाहेक चार वटाले योजना छनोट गरिसकेका छन् । आइतबार वडा नम्बर ५ को पनि योजना छनोट गर्ने कार्यक्रम छ ।’