बेनी : म्याग्दीमा एक वर्षमा १० वटा झोलुंगे पुल निर्माण भएका छन् । छरिएर रहेका बस्तीलाई जोड्न स्थानीय तह, साविक जिल्ला प्राविधिक कार्यालय, झोलुंगे पुल केन्द्रीय कार्यक्रम (स्वाप) र मिलन म्याग्दीको संयुक्त सहकार्यमा पुल निर्माण गरिएको हो ।
आर्थिक वर्ष ०७४/०७५ मा मालिकामा चार, धवलागिरिमा तीन, रघुगंगा, अन्नपूर्ण र मंगला गाउँपालिकामा १÷१ वटा पुल निर्माण भएको मिलन म्याग्दीकी कार्यकारी निर्देशक दिवा पुनले जानकारी दिइन् । ‘दुई वटा पुल बाढी र पहिरोले क्षतिग्रस्त भएको थियो भने ८ वटा नयाँ स्थानमा बनाइएको हो, पुलको माग उच्च भए पनि बर्सेनि ८÷१० वटा निर्माण हुने गरेका छन्’, उनले भनिन् । डाँडाकाँडामा रहेका बस्ती, कठिन भूगोल र खोलानाला बढी रहेका कारण बस्ती जोड्न म्याग्दीमा झोलुंगे पुलको माग उच्च छ । जिल्लामा २ सयभन्दा बढी पुलको माग रहेको बताइएको छ ।
मालिकाको टाक्से, दाङ, दोबिल्ला र ननथला खोलामा पुल निर्माण भएका छन् । १ करोड २० लाख रुपैयाँमा निर्मित चार वटा पुलबाट १६ सय घरधुरीका १० हजार १ सय २६ जनसंख्या लाभाविन्त भएका गाउँपालिका अध्यक्ष श्रीप्रसाद रोकाले जानकारी दिए । ‘गाउँपालिकाको दुर्गम गाउँमा पुल नहुँदा घुमाउरो बाटोमा घण्टौं लगाएर हिँड्नुपर्ने अवस्था थियो, सबै निकायको सहयोगमा पुल बनेपछि सर्वसाधराणलाई सहज भएको छ’, उनले भने, ‘गाउँपालिकाको अधिकांश बस्तीलाई पुलले जोडेको छ ।’
०७४ साउनमा म्याग्दी नदीमा आएको बाढीले धवलागिरि–४ जेल्तुङस्थित म्याग्दी खोलामाथि निर्माण भएको झोलुुंगे पुल बगाएपछि स्थानीय समस्यामा परेका थिए । सोही स्थानमा नयाँ पुल बनेसँगै धवलागिरिको छहरी, टरस र धनमानेमा पुल निर्माण भएका हुन् । तीन वटा पुल बनेपछि २ सय घरधुरीका १३ सय २७ जनसंख्यालाई सहज भएको गाउँपालिकाले जनाएको छ । जेल्तुङ, सिम्कोस र बगर गाउँ जिल्लाकै अति विकट बस्ती मानिन्छन् । धवलागिरिको जेल्तुङ र मालिकाको ननथुला बाढीग्रस्त भएका कारण गाउँपालिकाको मात्रै लगानी र अन्य पुल संयुक्त लगानीमा निर्माण भएका हुन् ।
पुलले अक्केर भीर र खोलाबाट वारपार गर्ने स्थानीयलाई तुइन र हिँउदको समयमा साँघु तर्नुपर्ने समस्याबाट मुक्ति पाएको गाउँपालिका अध्यक्ष थमसरा पुन मगरले बताइन् । ‘गाउँपालिकाले आवश्यकता महसुस गरेर यहाँ पुल निर्माणका लागि ठूलो रकम लगानी गरेको छ, पुल बनेपछि स्थानीय पनि खुसी भएका छन्’, अध्यक्ष पुनले भनिन् । मिलन म्याग्दीका अनुसार, मंगलाको अर्मनस्थित आरुखोला, अन्नपूर्णको हिस्तान र राम्चेमा ट्रस पुल, रघुगंगाको घ्यासीखर्कस्थित रघुगंगा नदीमा पुल निर्माण भएका छन् । ‘१० पुलका लागि तीन करोड ४३ लाख लाग्यो, यसबाट २५ सय ६ घरधुरीका साढे १४ हजार जनसंख्या लाभान्वित हुनेछन्’, निर्देशक पुनले भनिन् । म्याग्दीमा गत आव ०७३÷७४ मा पनि १० पुल निर्माण भएको थियो ।
प्रतिक्रिया दिनुहोस !
