तुलसीपुर : दाङको सदरमुकाम पुग्ने एक मात्रै सडकमा पर्ने खोल/खहरेमाथि पुल नबन्दा बर्सेनि धनजनको क्षति हुँदै आएको छ । तुलसीपुर—घोराही–लमही सडकखण्डमा एक दर्जन खोला छन् । वर्षासँगै यी खोलाले यात्रुहरूलाई सास्ती दिने गरेको छ । गएको वर्ष मात्रै खोलाले बगाउँदा तीन जनाको ज्यान गएको थियो । दर्जनौं अंगभंग भएका छन् । बर्सेनि सास्ती दिइरहने खोलामाथि पुल बनाउने योजना भने अलपत्र छ । कतिपय खोलामाथि सुरु भएका पुलसमेत वर्षाैंसम्म बनेका छैनन् । आइतबार मात्रै ग्वारखोलाले यात्रुबहाक बस बगाउँदा १८ जना यात्रु घाइते भए । तत्काल उद्धार भएकाले मानवीय क्षति भएन ।
वर्षासँगै खोला बढ्ने भएकाले यातायातका साधनले घण्टौंसम्म कुरेर बस्नुपर्ने बाध्यता छ । ‘पानी आयो कि बाटो बन्द भयो, एम्बुलेन्ससमेत गुड्ने अर्काे सडक छैन’, तुलसीपुरकी शिवा आचार्यले भनिन्, ‘कति वर्षसम्म हामीले सास्ती पाइरहने ? ’ आइतबार दिउँसो तुलसीपुरबाट घोराहीको कार्यालय हिँडेकी उनी खोला उलिएपछि फर्किन बाध्य भइन् । तुलसीपुर–घोराही सडकखण्डको ग्वारखोलासम्म सहजै पुगे पनि ग्वारखोला पारि जान नसकेर तुलसीपुर नै फर्कनुपरेको आचार्यले सुनाइन् । सार्वजनिक बसमा तुलसीपुरबाट घोराही हिँडेकी पूजा नेपालीलाई पनि गन्तव्यमा पुग्न मुस्किल भयो । ५ घण्टा किनारमा बसेर पनि बाढी कम नभएपछि बीच बाटोबाटै घर फर्कनुपरेको उनले बताइन् ।
अलपत्र पुल निर्माण
चार वर्षअघिदेखि दाङका खोलाहरूमा पुल निमार्ण सुरु गरिएको थियो । तर अझै काम अलपत्र छ । जिल्लाका ७ वटा खोलामा पुल निर्माण थालिएको थियो । दाङमा निर्माणाधीन पुलहरूले पनि नागरिकलाई थप सास्ती दिइरहेका छन । १८ महिनामा सम्पन्न हुनुपर्ने काम ४ वर्षसम्म पूरा नहुँदा बर्सेनि नागरिकले सास्ती भोगिरहेका छन् । सम्बन्धित निकायहरूको मौनता र निर्माण कम्पनीहरूको लापरबाही र ढिलासुस्तीका कारण पुल निर्माण अलपत्र परेको सरोकारवालाहरू आरोप लगाउँछन् ।
सरकारी निकायको मौनताका कारण सयौं नागरिकले दिनहुँजसो सास्ती खेप्न बाध्य भएका स्थानीय वि श्राम अधिकारीले गुनासो गरे । बबई नदी, कटुवा खोला, पत्रेखोला, गुर्जे खोला, सग्राम खोलालगायतमा पुल निर्माणको काम थालिए पनि ती सबै अलपत्र अवस्थामा छन् । ग्वारखोलामा निर्माण सुरु गरिएको पुल निर्माणको योजनाले मात्रै अहिले गति लिएको छ । सडक डिभिजन कार्यालयले निर्माण व्यवसायीको लापरवाहीका कारण निर्माणमा ढिलाइ भइरहेका बताएको छ ।
प्रतिक्रिया दिनुहोस !
