बेनी : सप्तऋषिले तपस्या गरेको पूण्यभूमि ऋखार क्षेत्रलाई धार्मिक पर्यटकीय गन्तव्यको रूपमा विकास गर्न स्थानीय अग्रसर भएका छन् । रघुगंगा–८ मा पर्ने ऋखार जिल्ला सदरमुकाम बेनीदेखि गलेश्वर, मौवाफाँट, दग्नाम, चिमखोला, घ्यासीखर्क, दुवाडी हुँदै तीन दिनको यात्रापछि पुग्न सकिन्छ ।
धवलागिरि आधारशिविर नजिक पर्ने ऋखारमा जनैपूर्णिमाका दिन विशेष मेला लाग्छ । पूजापाठ र दर्शनका लागि मन्दिर, धार्मिक पर्यटकको स्वागत र बासका लागि स्वागत गेट र सत्तल निर्माणमा स्थानीयले एक करोडभन्दा बढी लगानी गरिसकेका छन् । ऋखार संरक्षण तथा सुधार समितिका अध्यक्ष चित्र छन्त्यालले सरकारीले बेवास्ता गरे पनि चन्दा संकलन र भक्तजनमार्फत स्वःस्फुर्त रूपमा प्राप्त सहयोगले अतिआवश्यक भौतिक पूर्वाधार निर्माण गर्न सफल भएको जानकारी दिए ।
उनका अनुसार, ऋखारमा रहेको मुख्यसहित ८ वटा सहायक मन्दिर, भक्तजनको बासका लागि बगरखर्कमा तीन वटा सत्तल र दुवाडीमा स्वागत गेट सबै स्थानीयको श्रमदान र आर्थिक लगानीमा निर्माण गरिएका हुन् । ‘हामीले दुई महिनामा स्वागत गेट तयार पा¥यौँ, एक रुपैयाँ पनि सरकारी लगानी छैन । देउराली आमा समूहले विभिन्न किसिमका कार्यक्रम गरी जम्मा गरेको ७ लाख रुपैयाँ लगानी भएको छ’, उनले भने, ‘गाउँका बुद्धिजीवी र भक्तजनहरूको सहयोगले यस्ता काम सम्भव भइरहेका छन् ।’ मुख्य मन्दिर भने काठमाडौँमा बस्ने कुइनेमंगलेका समाजसेवी इन्द्रजित छन्त्यालले निर्माण गरेका हुन् । सत्तलहरू भने कुइनेमंगलेका साथै बेनी नगरपालिका–१० पात्लेखतका चूडामणि पौडेललगायतले आफ्ना स्वर्गीय आफन्तको स्मृतिमा निर्माण गरेका छन् । स्वागत गेट बनाउन दुवाडीका ४० भन्दा बढी घरधुरीले १० दिन श्रमदान गरेका थिए । ऋखारमा सप्तऋर्षि कश्यप, भारद्धाज, गौतम, जमदग्नी, वशिष्ठ, विश्वामित्र र अत्रिले तपस्या गरेको प्रलय भएको ग्रन्थहरूमा उल्लेख गरिएको छ ।
पवित्रभूमि भएका कारण ऋखार क्षेत्रमा थुप्रै सहयोगी मनहरूले सहयोग गरेका छन्।
प्रलयको स्थानमा बनेको तालमा सप्तऋर्षिहरू सयर गर्ने डुंगा रहेको अध्यक्ष छन्त्यालले जानकारी दिए । पवित्रभूमि भएका कारण ऋखार क्षेत्रमा थुप्रै सहयोगी मनहरूले सहयोग गर्ने क्रम बढेको पण्डित भीमनाथ पराजुलीले बताए । ‘सप्तऋर्षिहरूले तपस्या गरेका ठाउँ भएकोले भौगोलिक हिसाबले टाढा भए पनि देशका कुनाकन्दराबाट भक्तजनहरू त्यहाँ पुग्ने गरेका छन्’, उनले भने, ‘गलेश्वर र ऋखार क्षेत्रलाई जोडेर पर्यटन प्रर्वद्धन गर्न सकिन्छ ।’ स्थानीयको लगानी र श्रमदानमा बनाइएको स्वागत गेट भदौ ५ गते उद्घाटन गर्ने कार्यक्रम तय गरिएको सुधार समितिका सचिव अगेन्द्र छन्त्यालले जानकारी दिए । ‘जनैपूर्णिमामा दर्शनका लागि आउने भक्तजनका लागि हामीले स्वागत गेट बनाएका हौं, माथि मन्दिर क्षेत्रमा पनि सरसफाइ सुरु भएको छ’, उनले भने ।
ऋखार जाने भक्तजनहरू बेनीबाट दग्नामसम्म सवारीसाधन र त्यसपछि पैदल यात्रा गनुपर्छ । दग्नामबाट ६ घण्टामा घ्याखीखर्क वा दुवाडी पुगेर बास बसेपछि अर्को दिन मन्दिर पुग्न सकिन्छ । पात्लेखर्कदेखि माथि बस्ती नभएका कारण खाजा नास्ताको व्यवस्था आफैं गर्नुपर्छ । मन्दिर नजिक बगरमा सत्तलमा सुधार समितिले भोजनको व्यवस्था गरेको सचिव छन्त्यालले जानकारी दिए ।
प्रतिक्रिया दिनुहोस !
