दैलेख : नारायण नगरपालिकाका जनप्रतिनिधिले आइतबार सम्पत्ति सार्वजनिक गर्ने भएका छन् । जनप्रतिनिधिले आफूसँग भएको चल–अचल सम्पत्तिको विवरण एक कार्यक्रमबीच सार्वजनिक गर्ने तयारी गरेका हुन् । नारायण नगरपालिकाका प्रमुख, उपप्रमुख र वडाध्यक्षहरूले ११ औं राष्ट्रिय सूचना दिवसको अवसर पारेर सम्पत्ति सार्वजनिक गर्न लागेको बुझिएको छ । देशभरका स्थानीय तहमध्ये पहिलो पटक यस नगरपालिकाका जनप्रतिनिधिबाट सम्पत्ति सार्वजनिक गर्न लागिएको हो ।
जनप्रतिनिधिले भ्रष्टाचार निवारण ऐन २०५९ को दफा ५० को उपदफा (१) तथा अख्तियार दुरुपयोग अनुसन्धान आयोग ऐन २०४८ को दफा ३१ क को उपदफा (१) को प्रयोजनअनुसार सम्पत्ति विवरण फाराम भरेका छन् । सो फाराममा चलअचल सम्पत्ति, बैंक वित्तीय संस्थामा रहेको खाता, धितोपत्र, सेयर वा ऋणपत्रको विवरण, सवारीसाधन, कृषि तथा पशुधनलगायत उल्लेख गर्नुपर्ने कुरा समावेश गरिएको छ । फाराममा उल्लेख गरिएअनुसार विवरण भरेर जनप्रतिनिधिले हस्ताक्षर गरी सरोकारवाला र पत्रकारबीच सार्वजनिक गरिने बुुझिएको छ ।
नेपाल पत्रकार महासंघ दैलेखका अध्यक्ष चक्र केसीले आफ्नो कार्यकालभित्र प्रत्येक वर्ष नारायण नगरपालिकाका जनप्रतिनिधिले सम्पत्ति सार्वजनिक गर्नुपर्ने र यसको अनुसरण अन्य स्थानीय तहले पनि तत्काल गर्न आवश्यक रहेको बताएका छन् । ‘जनताको विश्वास प्राप्त जनप्रतिनिधिले आफ्नो सम्पत्ति सार्वजनिक गर्नुपर्छ,’ उनले भने, ‘स्थानीय तहमा सुशासन र पारदर्शिता कायम नै अहिले जनताको मुख्य चाहना हो ।’
नारायण नगरपालिकाका प्रमुख रत्नबहादुर खड्काले जनप्रतिनिधिप्रति नगरवासीको सकारात्मक सोच विकास गर्न सम्पत्ति सार्वजनिक गर्न लागिएको जानकारी दिए । नगर प्रमुख खड्काले भने, ‘निर्वाचित भइसकेपछि व्यक्तिगत जीवनबाट सार्वजनिक जीवनमा रहेर काम गर्दा जनताका प्रतिनिधिले सुशासन र पारदर्शितालाई आत्मसात् गर्नु महŒवपूर्ण कुरा हो ।’ आफ्नो कार्यकालभित्र जनप्रतिनिधिले भ्रष्टाचार गरे कि भन्ने भ्रमलाई जनताको मनवाट र गलत प्रचारवाजीलाई निस्तेज गर्न पनि सम्पत्ति सार्वजनिक अपरिहार्य रहेको उनको भनाइ छ ।
नारायण नगरपालिकाका जनप्रतिनिधिको सम्पत्ति सार्वजनिक कार्यक्रममा जनप्रतिनिधिबाट कानुनी व्यवस्थामा उल्लेख भएअनुसार ३÷३ महिनामा २० प्रकारका सूचना सार्वजनिक गर्ने र वार्षिक रूपमा जनप्रतिनिधिले सम्पत्ति सार्वजनिक गर्र्र्ने प्रतिबद्धता पनि गरिने भएको छ ।
सम्पत्ति सार्वजनिक कार्यक्रमको समन्वय नेपाल पत्रकार महासंघ दैलेख र सुन्दर नेपाल संस्था नागरिक समाज पारस्परिक जवाफदेहिता परियोजनाले सहजीकरण गर्ने भएको छ ।
प्रतिक्रिया दिनुहोस !
