बाढीले पुल बगाएपछि नुवाकोट-रसुवासँग सडक सम्पर्क टुट्यो

गेर्खु, नुवाकोट : पासाङल्हामू राजमार्गअन्तर्गत नुवाकोटमा बाढीले पक्की पुल बगाएको छ । खोलामा आएको बाढीले काम नलाग्ने गरि पुल बगाउँदा सडकमार्ग बन्द भएपछि नुवाकोट र रसुवाको जनजीवन अस्तव्यस्त भएको छ । 

अविरल वर्षातपछि आएको बाढीले पासाङल्हामू मार्गअन्तर्गत त्रिशूली–बेत्रावती–धुन्चे सडकमार्गको बीचमा रहेको विदुर नगरपालिका–१ गेर्खुस्थित पक्की पुल बगाउँदा आइतवारदेखि यातायात ठप्प भएको छ ।  सडके ठप्प हुँदा नुवाकोट र रसुवाको यातायात सम्पर्क बन्द भएको छ । 

बिहान २ बजे बिदुर नगरपालिका–१ इन्द्रायणीचौर र वडा नं. १० को सीमाना गेर्खुखोलामा आएको बाढीले सडकमार्गको पुल बगाउँदा पासाङल्हामू मार्गको त्रिशूली–धुञ्चे सडकखण्डमा सवारी आवागमन बन्द भएको छ । बाढीले पुलको अधिकांश संरचना भत्काएपछि तत्काल सवारी आवागमन सुचारु नहुने प्राविधिकहरुले बताएका छन् ।

पुल मर्मत गरेर बाटो सुचारु गर्ने स्थिति नभएका कारण अस्थायी पुल बनाउनुपर्ने सडक कार्यालय नुवाकोटका सुपरभाइजर वासुदेव खतिवडाले जानकारी दिए । अस्थायी संरचना तयार गरेर सडक सुचारु गर्नसमेत केही दिन लाग्ने उनले बताए । 

क्षतिग्रस्त पुल निरीक्षण गर्न पुगेका जिल्ला प्रशासन कार्यालय नुवाकोटका प्रशासकीय अधिकृत नन्दलाल शर्माले नजिकै अस्थायी डाइभर्सन बनाएर आवागमन सूचारु गर्न खोजिए पनि खोलामा पानीको बहाव नघटेसम्म डाइभर्सन बनाउन नसकिने बताए ।

बाढीले पुलको सबै भाग बगाएपछि रसुवा–नुवाकोट भएर चल्ने कुनै पनि सवारीसाधन चल्न सकेका छैनन् । यस सडकमार्गमा दैनिक तीनसय भन्दा बढी बस, ट्रक, कन्टेनर, माइक्रोबस गुड्ने गरेका थिए । 

सयौं गाडी वीचमै रोकिँदा हजारौं यात्रुलाई खानपान र वबोवबसको समस्या परेको विदुर नपा–१० का वडाध्यक्ष गणेशकुमार नेपाललले जानकारी दिए । 

पुल बगेपछि यात्रु तथा मालवाहक यातायातका साधन वैकल्पिक बाटोबाट चलाइएको जिल्ला प्रहरी कार्यालय नुवाकोटका प्रमुख तथा प्रहरी उपरिक्षक वसन्तवहादुर कुवँरले जानकारी दिए । अहिले सवारीसाधन बेत्रावती–नौबीसे–पहिरेबेसी–सोले–तुप्चे–आंगापुटार–त्रिशूली हुँदै सञ्चालन गरिएको छ ।