बड्डिचौर (सुर्खेत) : आयोजना सुरु भएको एघार वर्षपछि पश्चिम सुर्खेतको बराहतालमा खानेपानी उपलब्ध भएको छ । चार करोड भन्दा बढीको लगानीमा आयोजना सम्पन्न भएपछि स्थानीयले खानेपानी पाएका छन् । सरकारको अनुदान र स्थानीयको श्रमदानबाट लामो प्रतिक्षापछि आयोजना सम्पन्न भएसँगै स्थानीयलाई खानेपानीका लागि घण्टौंसम्म धाउनुपर्ने बाध्यतासमेत टरेको छ ।
यो आयोजनाबाट बराहताल गाउँपालिकाको वडानम्बर ५ र ८ का बासिन्दा लाभान्वित भएका छन् । नजिकै खानेपानी नहुँदा यहाँका बासिन्दाले डेढ घण्टासम्म गाग्रीमा पानी बोक्नुपर्ने बाध्यता थियो । खडेरीमा खानेपानीको हाहाकार नै हुने र वर्षातको धमिलो पानी पिउनुपर्ने बाध्यता भएपछि बड्डिचौर खानेपानी तथा सरसफाइ उपभोक्ता समितिले २०६४ सालमा यो आयोजना सुरु गरेको थियो ।
आयोजना सुरु गरिए पनि बजेट अभावका कारण समयमै काम नहुँदा सम्पन्न हुन एघार वर्ष लागेको हो । सरकारको अनुदान र स्थानीयको श्रमदानबाट सम्पन्न भएको यो आयोजनाबाट अहिले सात सय ७२ वटा धारा वितरण गरिएका छन् ।
आयोजना सम्पन्न गर्न चार करोड ४६ लाख ६६ हजार बजेट खर्च भएको छ । यसमा ८० प्रतिशत रकम सरकारको अनुदान हो भने २० प्रतिशत स्थानीयको श्रमदान छ । ‘आयोजना सम्पन्न गर्न निकै मुस्किल भयो, एघार वर्षसम्म हामी तनावमै रहयौं’, उपभोक्ता समितिका अध्यक्ष अर्जुन बुचा मगरले भने, ‘बजेट माग्दै सिंहदरबारसम्म पुग्यौं, नेताका दैलोमा पनि धायौं । धेरै मेहनतपछि आज धारामा पानी आएको छ, गाउँलेले वर्षौंपछि आँगनमै पानी पाएका छन् ।’
उनका अनुसार यो आयोजनाबाट अहिले सात सय ७२ वटा निजी धारा, १० वटा सार्वजनिक र चारवटा धारा असाय परिवारका लागि वितरण गरिएको छ । यसबाट तीन हजार पाँच सय ७७ जनसंख्या लाभान्वित बनेका छन् । आगामी दिनमा थप धारा वितरणको तयारी भइरहेको अध्यक्ष बुचाले जनाए ।
स्थानीय बासिन्दा डम्बर गंरजाले वर्षौंपछि आँगनकै धारामा पानी आएपछि आफूहरूलाई गाग्रीमा पानी बोक्नुपर्ने बाध्यता टरेको बताए । उनले भने, ‘यो क्षेत्रमा खानेपानीको निकै समस्या थियो, वर्षात्को भेल र धमिलो पानी पनि पिउनुपर्ने बाध्यता थियो । अब त्यो समस्या समाधान भयो, गाग्री बोक्नुपर्ने बाध्यता अब रहेन ।’
स्थानीय बेलमति सारुले भनिन्, ‘पहिल्यैबाट खानेपानी आउँछ भन्थे, काम सुरु भएको धेरै वर्षसम्म पनि नआउँदा हामीले आश मारिसकेका थियौं । तर आज आफ्नै आँगनको धारामा पानी आयो, अब हाम्रा दुःखका दिन गए ।’ खानेपानीकै लागि विगतमा आफूहरूले भोगेका दुख स्मरण गर्दै उनले पानीको जोहो गर्दैमा आधा उमेर बितेको बताइन् । गाउँमा पानी आएपछि हिजोआज बालबालिकालाई पनि समयमै विद्यालय पठाउन पाएको उनको भनाइ छ ।
क्षेत्रीय अनुगमन तथा सुपरिवेक्षण कार्यालय सुर्खेतले यो आयोजनाको पानी ९९ प्रतिशत शुद्ध भएको दाबी गरेको छ । कार्यालयका सिनियर डिभिजनल इन्जिनियर आविद हुसैनले भने, ‘हामीले यो आयोजनामा पानी शुद्धिकरणका लागि विशेष प्रविधि अपनाएका छौं, यहाँको पानी ९९ प्रतिशत शुद्ध छ ।’ साथै हुसैनले यो आयोजना नमूना र उत्कृष्ट भएकोसमेत दाबी गरे । वस्तीदेखि करिब १३ किलोमिटर टाढा रहेको मुहानबाट पानी ल्याइएको हो । आयोजनामा डमारेखोला, काप्राखोला र धाप छहराको मुहानबाट पानी ल्याएर वितरण गरिएको हो । खानेपानी आयोजना सम्पन्न भएर आँगनमै पानी आउन थालेपछि स्थानीयले खुशीयाली मनाएका छन् । खानेपानी उपलब्ध भएपछि हिजोआज सिँचाइमा समेत प्रयोग गर्न सहज भएको उनीहरूको भनाइ छ ।
‘भेरी लिफ्टिङको काम यसैबर्ष’
यसैबीच सुर्खेत उपत्यकाको खानेपानी संकट समाधानका लागि महत्वपूर्ण मानिएको भेरी लिफ्टिङ आयोजनाको काम यसैवर्ष सुरु हुने भएको छ । कर्णालीको राजधानी रहेको सुर्खेत उपत्यकामा हाल खानेपानीको अभाव छ । यसका लागि भेरी नदीको पानी उपत्यकामा ल्याउने तयारी भइरहेको छ ।
बड्डिचौर खानेपानी आयोजनाको उद्घाटन गर्दै खानेपानी तथा सरसफाइ मन्त्री बिना मगरले यही आर्थिक वर्षमा भेरी लिफ्टिङ आयोजनाको काम सुरु हुने जानकारी दिइन् ।
‘सुर्खेत उपत्यकाको खानेपानी संकट अब समाधान हुन्छ, सरकार यसमा गम्भीर छ’, मन्त्री मगरले भनिन्, ‘यो आयोजनाका लागि मन्त्रालयले बजेट विनियोजन गरेको छ, डीपीआरको काम पनि भएको छ । यो आर्थिक वर्षमा नै काम सुरु हुन्छ । अब उपत्यकाको खानेपानी संकट अन्त्य हुन्छ ।’
यस्तै मन्त्री मगरले सुर्खेतमा चौकुने, विद्यापुर, सालकोट र तरंगामा पनि खानेपानी आयोजना सञ्चालन गर्न मातहतका निकायलाई डीपीआरको प्रक्रिया अगाडी बढाउन निर्देशन दिइन् ।
प्रतिक्रिया दिनुहोस !
