कालिकोट : कालिकोटको नरहरिनाथ गाउँपालिका वडा नं. ५ मा सोमबारदेखि जारी सरद मेलामा ठूलाबडालाई भेडाको ऊनबाट बुनिएका राडीले सम्मान गरिएको छ । मेलामा प्रमुख अतिथि कर्णाली प्रदेशका मुख्यमन्त्री महेन्द्रबहादुर शाही, विशेष अतिथि कर्णाली प्रदेशका आन्तरिक मामिलामन्त्री नरेश भण्डारी, पर्यटनमन्त्री नन्दसिंह बुढा र प्रदेश सरकारका प्रवक्ता एवं सहकारीमन्त्री बिमला केसीलाई रुप्साबासीले ऊनीका राडीले सम्मान गरेका हुन् ।
भेडापालक किसानले उत्पादन गर्ने ऊनीका राडीको छुट्टै महत्व छ । सामान्यतः घरमा आउने अतिथिलाई ऊनीका राडी बिछाएर बसाल्ने गरिन्छ । विवाहमा दुलाहा, दुलहीलाई जग्गेमा ऊनीकै राडीमाथि बसालिन्छ । यस्तै गाउँका ठूलाबडा, भद्रभलादमीसहित गाउँमा हुने समसामयिक छलफल पनि ऊनीका राडीमै बसेर हुन्छ । तर रुप्साका नागरिकले कर्णाली प्रदेशका मुख्यमन्त्रीसहित चार जना मन्त्रीलाई रुप्साको चिनो र राडीको प्रचारप्रसारका लागि औपचारिक कार्यक्रममा अतिथि भएका बेला ऊनीका राडी ओडाएर सम्मान गरेका हुन् ।
कार्यक्रममा मन्त्रीहरूलाई ऊनीका राडीका साथ रुप्सामै निगालोबाट बुनिएको रोटी राख्ने छाप्री र त्यसमा लोकल काँक्रो पनि राखिएको थियो । सोमबारदेखि सुरु भएको रुप्सा मेला बुधबारसम्म चल्नेछ । मेलाको उद्घाटन गर्न नरहरिनाथ पुगेका कर्णाली प्रदेशका मुख्यमन्त्री महेन्द्रबहादुर शाहीले कर्णालीलाई पर्यटकीय गन्तव्य बनाउने उद्घोष गरे । प्रदेश सरकारले पर्यटकीय सम्भावनाको कालिकोटमा अन्तरजिल्ला जोड्ने पर्यटकीय मार्ग निर्माणमा उच्च प्राथमिकता दिएको बताए ।
नरहरिनाथ गाउँपालिका ५ का वडाध्यक्ष सिर्जन फडेराले अतिथिलाई रुप्साको चिनोको रूपमा ऊनीका राडीले सम्मान गरिएको बताए । उनले रुप्साको स्थानीय उत्पादन बजारीकरण गर्न अतिथिलाई राडी उपहार दिइएको बताए । उनले भने, ‘रुप्सामा हरेक वर्ष असोज १ गते लाग्ने सरद मेला परापूर्व कालदेखि लाग्दै आएको छ । स्थानीयले सबै बर्खे बालीका काम सकाएर आराम गर्ने समयमा रमाइलोका लागि लगाउने रुप्सा मेलाको स्थानीयस्तरमा ठूलो महत्व छ । यसलाई केही वर्षदेखि महोत्सवजस्तै मनाउँदै आएका छौं । यस मेलामा कालिकोट, अछाम, दैलेखलगायत जिल्लाबाट दर्शक आउने गरेका छन् ।
प्रतिक्रिया दिनुहोस !
