भन्सार छलेर नेपाल भित्र्याइएको २ लाख ५७ हजार बराबर सामान बरामद

भैरहवा : रुपन्देहीको सीमा नाका बेलहियाबाट भन्सार छली गरेर ठूलो मात्रामा नेपाल भित्र्याइएका कपडा लगायत चाडबाडका सामाग्री सशस्त्र प्रहरीले बरामद गरेको छ ।

सशस्त्र प्रहरी बल नेपाल राजश्व तथा भन्सार सुरक्षा गस्ती नम्बर ३८ गुल्म डण्डाले सुट, साडी, कूर्ता, सरुवाल लगायत २ लाख ५७ हजार रुपैयाँ बराबरको सामान बरामद गरेको हो । व्यापारिक प्रयोजनका लागि भारतबाट सामान भित्र्याइएको भन्दै प्रहरीेले बरामद गरेको बताएको छ ।

भैरहवादेखि बुटवलतर्फ जाँदै गरेको लु. १ ज २८७० नम्बरको गाडी चेकजाँच गर्दा गाडीमा रहेको कुचोको बिलबिजक रहेको र सोही गाडीमा प्रज्ञापनपत्रबिना २१ वटा बोरामा प्लाष्टिकका विभिन्न साम्रगी भेटिएको थियो ।

सशस्त्र प्रहरीको टोलीले गाडी र चालकलाई अनुसन्धान गरी कारवाहीको लागि राजश्व अनुसन्धान कार्यालय बुटवल बुझाएको छ । चालक नुवाकोट ताराकेश्वर–६ का ४९ वर्षीय नवराज रिमाललाई राजश्व अनुसन्धान कार्यालयले २ लाख ४७ हजार धरौटीमा छोडेको बताइएको छ ।

दशैँ–तिहार नजिकएसँगै कपडा लगायत अन्य साम्रगीको तस्करी सुरु भएपछि सस्शत्र प्रहरी बलले तस्करी नियन्त्रणमा कडाइ गरेको बताएको छ।