फिदिम : पाँचथर सदरमुकाम फिदिमस्थित फिदिम उच्च माविको खेल मैदानमा दोस्रो तरुण गोल्डकप सुरु भएको छ । शनिबारदेखि सुरु भएको गोल्डकपको उद्घाटन नेपाली कांग्रेसका प्रबक्ता विश्वप्रकाश शर्माले गरे ।
नेपाल तरुण दलको ६६ औँ स्थापना दिवसको अवसर पारेर तरुण दल पाँचथरले गोल्डकप प्रतियोगिताको आयोजना गरेको हो । उद्घाटन कार्यक्रममा बोल्दै प्रबक्ता शर्माले खेलकुद जस्तो क्षेत्रमा कसैले पनि राजनीति गर्न नहुने बताए । अहिलेदेखि नै खेलकुद क्षेत्रमा सरकारले लगानी बढाउन थाले स्वास्थ्य क्षेत्रमा गर्नुपर्ने लगानी घटेर जाने शर्माको भनाइ छ ।
राष्ट्र र स्वास्थ्यका लागि खेलुकद भएकाले खेलकुद सबैको साझा हुनुपर्नेमा शर्माको जोड थियो । ‘राष्ट्रको शिर उच्च राख्ने खेलाडी हुन्,’ शर्माले भने ‘खेलकुदको विकास गर्न खेलाडीका परिवारको चुलो चौकाको अवस्था सरकारले बुझ्न जरुरी छ ।’
कातिक १६ गतेसम्म सञ्चालन हुने पालिका स्तरीय फुटबल प्रतियोगितामा पाँचथरका आठ ओटा स्थानीयल तहले सहभागिता जनाएका छन् । मिक्लाजुङ, हिलिहाङ, कुम्मायक, तुम्बेवा, फाल्गुनन्द, फालेलुङ, याङवरक गाँउपालिका र फिदिम नगरपालिकाले प्रतियोगितामा भाग लिएका हुन् ।
शनिबार भएको उद्घाटन खेलबाट मिक्लाजुङले हिलिहाङलाई हराएर सेमिफाइनलको यात्रा तय गरेको छ । हिलिहाङलाई ३–० गोल अन्तरले हराउँदै मिक्लाजुले सेमि फाइनलको स्थान पक्का गरेको हो । मिक्लाजुङको जितका लागि सोमकुमार राई र सुनील राईले एक एक गोल गरे ।
हिलिहाङका खेलाडीले आत्मघाति गोल गरेपछि मिक्लाजुङ थप एक गोल थपिएको थियो । शनिबार भएको प्रतियोगितामा मिक्लाजुङका मेहरमान खवास म्यान अफ दी म्याच घोषित भए । उनले एक हजार नगद प्राप्त गरे । प्रतियोगितामा प्रथम हुने टिमले एक लाख एक हजार एक सय ६६ रुपैयाँ र दोस्रो हुने टिमले ५१ हजार एक सय ६६ रुपैयाँ नगद पुरस्कारसहित ट्रफी प्राप्त गर्ने तरुण दल पाँचथरका अध्यक्ष सुमन लामाले जानकारी दिए ।
प्रतिक्रिया दिनुहोस !
