जाजरकोट : सुत्केरी हुन नसकेर गर्भमै बच्चा मृत्यु भएको र अत्यधिक रक्तस्रावका कारण ज्यानै जोखिममा रहेकी वारेकोट–२ रोकायगाउँकी ४२ वर्षीया मैसरा थापालाई सिम्रिक एयरको हेलिकप्टरबाट मनीपाल अस्पताल पोखरा पुर्याइएको छ । बारेकोट गाउँपालिका अध्यक्ष महेन्द्र शाहको पहलमा घरआँगन नेपालले थापालाई उद्धार गरेको संस्थाका अध्यक्ष दीपक सिलवालले जानकारी दिए ।
अध्यक्ष शाहले हेलिकप्टरमा लाग्ने खर्च २५ प्रतिशतसम्म स्थानीय निकायले व्यहोर्ने प्रतिबद्धतासमेत जनाए । ‘रक्तस्राव भएको ३ दिनसम्म स्थानीय धामीझाँक्री र लामाले कुलदेवता बिग्रेको भनेर झारफुक गरे, कुखुरा सुँगुर काटे, नभएपछि गाउँपालिकालाई गुहारेका हुन्’, बिरामी मैसरासँगै उपचार गराउन अस्पताल पुगेका उनका देवर हिमबहादुरले भने ।
गाउँपालिका अध्यक्ष शाहले भने, ‘आर्थिक अभाव र भौगोलिक विकटताका कारण समयमै अस्पताल पुर्याउन नसकेर अकालमा मृत्युको मुखमा पुग्छन्, सडक नभएर निकै कठिन छ ।’ घरआँगन नेपालले यसअघि सुत्केरी हुन नसकेर कठिन अवस्थामा रहेका ६ जना गर्भवतीको हवाई उद्धार गरिसकेको छ ।
हेलिकप्टर प्रयोग गरेको १ महिनाभित्र रकम भुक्तानी गर्नुपर्ने सिम्रिक एयरसँग आपसी सम्झौता भएको शाहले बताए । उद्धार गर्ने संस्थाले नेपाल मेडिकल कलेजसँग सम्झौता गरी निःशुल्क उपचार प्रबन्धसमेत मिलाएको छ ।
प्रतिक्रिया दिनुहोस !
