अमिताभसँग कादर खानको सम्बन्ध : ‘सर जी’ नभन्दा फिल्मबाट बाहिरिए

नयाँदिल्ली : पछिल्लो साता दिवंगत भएका बलिउडका लोकप्रिय अभिनेता कादर खान र बलिउडका बादशाह नै भनेर चिनिने अमिताभ बच्चनबीचका सम्बन्धका अनेक आयाम खुल्न थालेका छन् ।

कादर खान र अमिताभ बच्चन अति निकटका मित्र हुँदा हुँदै पनि केही साना घटनालाई लिएर उनीहरुबीच सम्बन्ध नै बिग्रिएका समाचार भारतीय मिडियाले सार्वजनिक गरको छन् ।

कादर खानले सन् २०१२ मा दिएको एक भिडियो अन्तरवार्तामा यसबारे खुलेर बोलेका पनि छन् । अमिताभ बच्चन राजनीतिमा लाग्नुअघि र पछि खानसँग कस्तो सम्बन्ध रह्यो भन्ने बारे उनले खुलेर बोलेका छन् ।

अमिताभ बच्चन कांग्रेसको तर्फबाट सांसदको उम्मेदवारी दिने गरिरहँदा कादर खानले राजनीति नगर्न सुझाव दिएको कुरा खुलाएका छन् । तर अमिताभले खानको सल्लाह विपरित उम्मेदवार बने र चुनाव नै जिते । खानले यसबारे ‘पहिलेको अमिताभ नरहेर अर्कै अमिताभ बने’ भन्दै यसबारे टिप्पणी गरेका थिए ।

अमिताभलाई ‘सर जी’ नभन्दा...
खासमा अमिताभ बच्चन राजनीतिमा लागेपछि उनलाई अधिकांशले ‘सर जी’ भनेर सम्बोधन गर्थे । कादर खानले भने आत्मीय ठानेर ‘अमित’ मात्रै भन्थे । फिल्म ‘खुदा गवाह’मा कादर खानलाई निर्माताले नै अमिताभलाई सर जी भनेर सम्बोधन गर्नुपर्ने शर्त राखेका थिए ।

फिल्म सुटिङमा जाने बेला त कादर खानले अमिताभलाई अमित मात्रै भनिरहे । धेरै पटक प्रयास गर्दा पनि उनले सर जी भनेर सम्बोधन नै गर्न सकेनन् । अन्ततः कादर खानलाई निर्माताले फिल्मबाटै हटाउनुपर्यो ।

यस फिल्मपछि अमिताभ बच्चनसँग पनि कादर खानको सम्बन्ध बिग्रियो । यसबारे खानले २०१२ को युट्यूभ भिडियोमा खुलासा गरेका छन् । उक्त भिडियोमा खानले अमिताभलाई राम्रो मित्र ठान्ने बताएका थिए । तर अमिताभको राजनीतिमा लाग्ने निर्णयबाट दुखी भएको पनि खानको टिप्पणी छ ।

जब कि, कादर खानले अमिताभका २२ वटा फिल्ममा डायलग नै लेखेका थिए । ‘मुकद्दरका सिकन्दर’, ‘नसीब और’, ‘अग्निपथ’ जस्ता फिल्ममा अमिताभकै लागि कादर खानले डायलग लेखेका थिए । खानको निधनपछि ६ वर्षअघिको उक्त भिडियोबारे भारतीय संचारमाध्यमले समाचार बनाएका छन् । अमिताभले भने यसबारे टिप्पणी गरेका छैनन् ।