लन्डन : युरोपियन क्लब फुटबलको दोस्रो ठूलो प्रतियोगिता ‘युरोपा लिग’ को शुक्रबार बिहान भएको खेलमा इङ्लिस क्लब चेल्सीले स्विडिस प्रतिद्वन्द्वी माल्मोमाथि २-१ गोलको जित हात पारेको छ । अन्तिम ३२ टोलीबीचको भिडन्तको पहिलो लेग खेलमा माल्मोलाई उसैको मैदानमा हराएपछि चेल्सीले अघिल्लो चरणमा पुग्ने सम्भावना बलियो बनाएको छ ।
उक्त जितले चेल्सीका प्रशिक्षक माउरिजियो सारीलाई पनि केही राहत दिएको छ । गत आइतबार घरेलु लिग इङ्लिस प्रिमियर लिगमा म्यानचेस्टर सिटीसँग चेल्सी ६-० गोलले पराजित भएपछि प्रशिक्षक सारीको निकै आलोचना भएको थियो । म्यानचेस्टर सिटीसँगको उक्त लज्जास्पद हारपछि प्रशिक्षक सारीको विकल्प खोजिने चर्चा पनि सुरु भएको थियो ।
माल्मोविरुद्धको खेलमा चेल्सीले दुबै हाफमा एक÷एक गोल गर्यो । खेल सुरु भएको ३०औं मिनेटमा रोस बार्कलीले चेल्सीका लागि पहिलो गोल गरेका थिए । उनले पेड्रोको पासमा गोल गरेका हुन् । उनले सन् २०१९ सुरु भएपछि चेल्सीका लागि गरेको यो पहिलो ‘अवे गोल’ हो ।
यसैगरी ५८औं मिनेटमा ओलिभर गिरोडले टोलीको अग्रता दोब्बर बनाएका थिए । गिरोडले युरोपियन प्रतियोगितामा लगातार चौथो खेलमा गोल गरेका हुन् । उनी सन् २०१३ को मेपछि चेल्सीका लागि युरोपियन प्रतियोगिताको लगातार चार खेलमा गोल गर्ने पहिलो खेलाडी हुन् । सन् २०१३ मा भने भिक्टर मोसेसले लगातार चार खेलमा गोल गरेका थिए ।
निर्धारित समयको खेल सकिनुभन्दा १० मिनेटअघि घरेलु टोली माल्मोका लागि आन्द्रेस क्रिस्टिन्सनले जवाफी गोल फर्काएका थिए । जारी सिजनको युरोपा लिगमा भने चेल्सी हालसम्म अपराजित रहँदै आएको छ । प्रतियोगिताको दोस्रो लेग खेल फेब्रुअरी २१ तारिखमा चेल्सीको घरेलु मैदानमा खेलिने छ ।
‘मेरो विचारमा हामी एउटा राम्रो खेल खेल्दै फेरि लयमा फर्किएका छौं । यो जितले हाम्रो आत्मविश्वास पनि बढाएको छ । हाम्रो अगाडिको यात्रा भने अझै सहज छैन’, जितपछि प्रशिक्षक सारीले भनेका छन् । उनको प्रशिक्षकत्वमा हालसम्म ४० खेल खेलेको चेल्सीले २७ जित हात पारेको छ भने आठ खेलमा पराजय भोगेको छ । यी खेलमा चेल्सीले ७१ गोल गरेको छ भने ४० गोल खाएको छ ।
स्विडिस क्लब माल्मो युरोपा लिगको घरेलु मैदानमा खेलिएको खेलमा सन् २०१५ को नोभेम्बरयता पहिलो पटक पराजित भएको हो । सन् २०१५ को नोभेम्बरमा माल्मोलाई फ्रान्सेली क्लब पेरिस सेन्ट जर्मन (पीएसजी) ले घरेलु मैदानमै ५-० गोलले हराएको थियो ।
यसैगरी चेल्सी सन् १९६७ को सेप्टेम्बरपछि माल्मोलाई उसैको घरेलु मैदानमा हराउने पहिलो इङ्लिस क्लब बनेको छ । सन् १९६७ को सेप्टेम्बरमा इङ्लिस क्लब लिभरपुलले माल्मोलाई उसैको घरेलु मैदानमा पराजित गरेको थियो ।
शुक्रबार विहान खेलिएको अर्को खेलमा स्पेनिस क्लब भ्यालेन्सियाले स्कटल्यान्डको सेल्टिकलाई उसैको मैदानमा २-० गोलले हरायो । भ्यालेन्सियाका लागि ४२औं मिनेटमा डेनिस चेरिसेभ र ४९औं मिनेटमा रुबेन सोब्रिनोले एक÷एक गोल गरेका थिए । दोस्रो लेग खेल भ्यालेन्सियाको मैदानमा खेलिने छ ।
इटालियन सिरिए क्लब नापोलीले भने स्विट्जरल्यान्डको एफसी जुरिचलाई उसैको मैदानमा ३-१ गोलले पाखा लगाउँदै अघिल्लो चरण प्रवेशको सम्भावना बलियो बनायो । क्लब ब्रुगले घरेलु मैदानमा साल्जबर्गलाई २-१ गोलले हरायो भने भिल्लारियलले स्पोर्टिङ सीपीमाथि १-० गोलको प्रतिस्पर्धात्मक जित हासिल गर्यो ।
भिक्टोरिया पल्जनले पनि घरेलु मैदानको फाइदा उठाउँदै डाइनामो जाग्रेबलाई २-१ गोलले हरायो । साख्तर डोनेस्क र इनरिच्ट फ्राँकफर्टबीचको खेल भने २-२ गोलको बराबरीमा सकियो । स्पेनिस क्लब रियल बेटिस पनि रेन्ससँग ३-३ गोलको बराबरीमा रोकियो । ओलम्पियाकसले डायनामो किभलाई २-२ गोलको बराबरीमा रोक्यो ।
स्पेनिस क्लब सेभिलले भने बलियो इटालियन प्रतिद्वन्द्वी लाजियोलाई उसैको मैदानमा उसैको मैदानमा १-० गोलले हराउँदै अघिल्लो चरण प्रवेशको सम्भावना बलियो बनायो । सेभिलका लागि विसम बेन एदरले निर्णायक गोल गरे ।
अर्को इटालियन क्लब इन्टर मिलानले रापिड वियनालाई उसैको मैदानमा १-० गोलले पाखा लगायो । बेनफिकाले पनि गालातसारेलाई उसैको मैदानमा २-१ गोलले पराजित गर्यो । बलियो इङ्लिस क्लब आर्सनल भने बेलारुसको बेट बोरिसोभसँग उसैको मैदानमा १-० गोलले पराजित भयो ।
घरेलु टोली बोरिसोभका लागि पहिलो हाफको अन्तिम समयमा स्टानिस्लाभ ड्रागुनले निर्णायक गोल गरेका थिए । निर्धारित समयको खेल सकिनुभन्दा पाँच मिनेटअघि आर्सनलका एलेक्जेन्डर लाकाजेट्टी रातो कार्ड पाउँदै मैदानबाट बाहिरिएका थिए ।
बेट बोरिसोभका एलेक्जेन्डर फिलिपोभिचलाई कुइनोले प्रहार गरेका कारण लाकाजेट्टीले रातो कार्ड पाएका थिए । त्यसअघि दोस्रो हाफको खेल सुरु हुनासाथ लाकाजेट्टीले नै गरेको एउटा गोललाई रेफ्रीले अफ साइड घोषित गरेका थिए ।
प्रतिक्रिया दिनुहोस !
