निर्मला बलात्कार-हत्या प्रकरण : आरोपित एसपी विष्ट अदालतमा

कञ्चनपुर  :  निर्माला पन्तको बलात्कार र हत्या प्रकरणमा लापरवाही गरेको अभियोगमा सेवाबाटै बर्खास्त गरिएका तत्कालीन एसपी डिल्लीराज विष्ट अदालतमा उपस्थित भएका छन । आरोपित  विष्ट मंगलबार बिहान कञ्चनपुर जिल्ला अदालतमा उपस्थित भएका हुन् । 

निर्मला बलात्कार हत्या प्रकरणमा प्रमाण नष्ट गरेको, अभियुक्त भनी पक्राउ गरिएका दिलिपसिंह विष्टलाई यातना दिएकोलगायतका आरोपित विष्टमाथि छ । अदालतले उनीसँग बयान लिन सुरु गरेको छ । बयान सकिए मंगलबार नै थुनछेक बहस हुने कञ्चनपुर जिल्ला अदालतका श्रेस्तेदार हरिकृष्ण अवस्थीले जfनकारी दिए । 

अदालतले विष्टसहित ८ जना प्रहरीलाई ३५ दिने म्याद जारी गरी अदालतमा उपस्थित हुन सूचित गरेको थियो। आरोपित ६ प्रहरी यसअघि नै अदलतमा उपस्थित भइसकेका छन् ।  

तत्कालीन डीएसपी ज्ञानबहादुर सेठी, तत्कालीन प्रहरी निरीक्षकद्वय एकेन्द्र खड्का र जगदीशप्रसाद भट्ट, निलम्बित सई हरिसिंह धामी र रामसिंह धामी तथा प्रहरी जवान चाँदनी साउद यसअघिनै अदालतमा उपस्थित  भएका थिए ।  विष्ट र  निलम्बित सीआईबीका डीएसपी अंगुर जीसी भने फरार थिए ।  डीएसपी जिसी भने अझै फरार छन् ।