एम्सटरडम : सन् २०२० मा आयोजना हुने युरो कप फुटबलको छनोट खेलमा नेदरल्यान्ड्सले विजयी सुरुआत गरेको छ । नेदरल्यान्ड्सले शुक्रबार बिहान खेलिएको आफ्नो पहिलो छनोट खेलमा बेलारुसमाथि ४-० गोलको सजिलो जित हासिल गर्यो ।
घरेलु मैदानमा भएको समूह ‘सी’ अन्तर्गतको खेलमा नेदरल्यान्ड्सका लागि मेम्फिस डिपेले दुई गोलको योगदान गरे । खेल सुरु भएको पहिलो मिनेटमै डिपेले नेदरल्यान्ड्सका लागि पहिलो गोल गरेका थिए । २१औं मिनेटमा जर्जिनो विजनाल्डमले टोलीको अग्रता दोब्बर बनाए ।
पहिलो हाफमा दुई गोल गरेको नेदरल्यान्ड्सले दोस्रो हाफमा पनि दुई गोल थप्यो । खेलको ५५औं मिनेटमा डिपेले पेनाल्टीमार्फत गोल गर्दै टोलीलाई ३-० ले अगाडि बढाए । निर्धारित समयको खेल सकिनुभन्दा चार मिनेटअघि भिर्जिल भान जिकले नेदरल्यान्ड्सका लागि चौथो गोल थपेका थिए ।
सोही समूहको अर्को खेलमा उत्तरी आयरल्यान्डले पनि तुलनात्मक रुपमा कमजोर प्रतिद्वन्द्वी इस्टोनियालाई २-० गोलले पाखा लगायो । घरेलु मैदानमा खेलिएको खेलमा उत्तरी आयरल्यान्डका लागि निल म्याकजिन र स्टिभन डेभिसले एक÷एक गोल गरे ।
समान तीन अंक बटुलेको नेदरल्यान्ड्स पहिलो र उत्तरी आयरल्यान्ड दोस्रो स्थानमा छन् । विश्वकपको पूर्वविजेता जर्मनी पनि सोही समूहमा परेको छ ।
प्रतिक्रिया दिनुहोस !
