बारा-पर्सा अपडेट : मृतकका प्रत्येक परिवारलाई प्रदेश सरकारले ३ लाख दिने
चैत १८, २०७५ सोमबार २०:४६:०
जनकपुरधाम : बारा र पर्सामा आएको भीषण हावाहुरीबाट मृत्यु भएका परिवारलाई प्रदेश सरकारले प्रतिपरिवार ३ लाख आर्थिक सहायता उपलब्ध गराउने भएको छ ।
सोमबार बसेको प्रदेश २ को मन्त्रिपरिषद् बैठकले हावाहुरीबाट घाइतेको सम्पूर्ण उपचार खर्च प्रदेश सरकारले बेहोर्ने पनि निर्णय गरेको छ । प्रदेश सरकारले हावाहुरीबाट भएको क्षतिका सम्बन्धमा अध्ययन गर्न राहत तथा व्यवस्थापन उच्चस्तरीय समिति गठन गरेको छ ।
आन्तरिक मामिला तथा कानुनमन्त्री ज्ञानेन्द्रकुमार यादवको संयोजकत्वमा गठित पाँच सदस्यीय समितिमा उद्योग, पर्यटन, वन तथा वातावरणमन्त्री रामनरेश राय, सामाजिक विकासमन्त्री नवलकिशोर साह, मुख्य न्यायाधिवक्ता दीपेन्द्र झा र आन्तरिक मामिला तथा कानुन मन्त्रालयका उपसचिव अरुण कुमार झा सदस्य छन् ।
कानुनमन्त्री यादवले भने, ‘विपद् व्यवस्थापन उद्धार, क्षतिपूर्ति, उपचार र तत्काल राहत उपलब्ध गराउने लगायतका कामका लागि संघीय सरकार, स्थानीय सरकार, सरोकारवाला, संघसंस्थालगायत नेपाली सेना, नेपाल प्रहरी, सशस्त्र प्रहरी र निजामती कर्मचारीलाई आह्वान गरेका छौं ।’ मन्त्रिपरिषद्ले मृतकप्रति श्रद्धाञ्जली अर्पण गर्दै शोक सन्तप्त परिवारजनमा समवेदना व्यक्त गरेको छ । साथै घाइतेको शीघ्र स्वास्थ्यलाभको कामना गरिएको छ ।
विपद् व्यवस्थापनका लागि तत्काल औषधि, खाद्यान्न, त्रिपाल, औषधि र उपचार सेवा उपलब्ध गराउन जिल्ला देवी प्रकोप उद्धार समितिलाई क्रियाशील गराई परिचालन गर्ने निर्णय पनि मन्त्रिपरिषद् बैठकले गरेको छ । प्रदेश सरकारले विपद् व्यवस्थापन उद्धार, क्षतिपूर्ति, उपचार र राहत सहयोग उपलब्ध गराउन विभिन्न सरोकारवालाला व्यक्ति, संघसंस्था तथा सम्बद्ध निकायलाई आह्वान गरेको छ । सहयोग गर्न चाहनेले राष्ट्रिय वाणिज्य बैंक लिमिटेड, जनकपुरधाम शाखाको मुख्यमन्त्री राहत कोषको खाता नं. १२२०५०३०००००० मा रकम जम्मा गर्न सक्नेछन् ।
प्रदेशसभा बैठक स्थगित
प्रदेश २ मा सोमबारका लागि बोलाइएको प्रदेशसभा बैठक स्थगित गरिएको छ । प्रदेशसभा सचिवालयले सूचना टाँस गरी बैठक स्थगित गरेको हो । बारा र पर्सामा आएको भीषण हावाहुरीका कारण बैठक स्थगित गरिएको सूचनामा जनाइएको छ । अर्को बैठक बुधबार दिनको १ बजे बोलाइएको छ ।
प्रतिक्रिया दिनुहोस !
