हिन्दु धर्म संरक्षणका लागि आन्दोलन गर्न शंकराचार्यको आग्रह
दमौली : भारतका एक शंकराचार्यले हिन्दु धर्मको संरक्षणका लागि आन्दोलन गर्न तनहुँका स्थानीयलाई आग्रह गरेका छन् । म्याग्दे ३ किलचोकमा अकलादेवी मन्दिरको शिलान्यास गर्दै काशी सुमेरु पीठाधिश्वर जगतगुरु शंकाराचार्य अनन्त विभुषित स्वामी नरेन्द्रानन्द सरस्वतीजी माहाराजले नेपालमा हिन्दु धर्म संकटमा परेको बताएका छन् ।
हिन्दुको उद्गमस्थल भए पनि केही व्यक्तिको स्वार्थका कारण संकट परेको उनको भनाइ थियो । उनले देशलाई हिन्दु राष्ट्र बनाए मात्र धर्म जोगिने बताए । ‘नेपाललाई हिन्दू राज्य बनाउन आवश्यक छ,’ उनले भने, ‘यसका लागि तपाईँहरु जाग्नुस् । मेरो साथ रहनेछ ।’
साढे ३ करोड लागत अनुमान गरिएको मन्दिरको शिलान्यास गर्दै उनले अकला मन्दिर पशुपतिनाथ जस्तै शक्तिपीठ भएको बताए । उनले मन्दिरबारे थाहा पाएर आफु शिलान्यासका लागि आएको बताए । उनले मन्दिरका लागि सक्दो सहयोग गर्ने प्रतिवद्धता जनाए ।
कार्यक्रममा मन्दिरका संस्थापक पण्डित पशुपतिनाथ घिमिरेले मन्दिरको महिमाबारे बोलेका थिए । उनले सत्कर्म हुँदा मन्दिरमा घण्टा बज्ने गरेको सुनाए । योगी नरहरिनाथले मन्दिरमा ८५ औं कोटिहोम गरेको उनले स्मरण गरे ।
मन्दिरका डिजाइनर भक्तपुरका इन्जिनियर विनोद खड्काले मन्दिरको प्राविधिक पक्षका बारेमा जानकारी दिएका थिए ।
मन्दिर व्यवस्थापन समितिका अध्यक्ष पुर्णमान श्रेष्ठको सभापतित्वमा भएको कार्यक्रममा बालहरि घिमिरे, जानुका थापा, दधिराज घिमिरेलगायतले बोलेका थिए ।
गत वर्षको महायज्ञबाट शंकलन भएको ७० लाख र बाँकी लागत संघ, प्रदेश र स्थानीय तहबाट आउने प्रतिवद्धता आएको स्थानीय दधिराज घिमिरेले बताए ।