लण्डन : आईसीसी एकदिवसीय विश्वकप क्रिकेटअन्तर्गत शनिबार राति भएको खेलमा न्युजिल्याण्डले वेस्ट इन्डिजलाई हराएको छ। यस प्रतियोगितामा अपराजित रहँदै आएको न्युजिल्याण्डले बलियो वेस्ट इन्डिजविरुद्ध ५ रनको संघर्षपूर्ण जित निकालेको हो । टस हारेर पहिले ब्याटिङमा उत्रिएको न्युजिल्याण्डले ५० ओभरमा ८ विकेट गुमाएर २९१ रन बनाएको थियो । २९२ रनको लक्ष्यकासाथ जवाफी ब्याटिङमा उत्रिएको वेस्ट इन्डिजले ४९ ओभरमा २८६ रन बनाउँदा सबै विकेट गुमाएर हार व्यहोरेको हो।
वेस्ट इन्डिजले सुरुमै न्युजिल्याण्डको विकेट लिएर दबाबमा राखे पनि रोस टेलर र कप्तान केन विलियमसनले उच्च स्कोरको साझेदारी गरेपछि गतिलो स्कोर बनाउन सकेको थियो । ओपनरद्वय मार्टिन गुप्टिल र कोलिन मुन्रो शुन्य रनमै आउट हुँदा विलियमसनले १५४ बलमा १४८ रन र रोस टेलरले ९५ बलमा ६९ रन बनाए। जाम्स निसमले २८ र कोलिन डे ग्रान्डोम्मेले ६ बलमा १६ रन बनाए।
वेस्ट इन्डिजका लागि सेल्डोल कटरेलले ४, कार्लाेस ब्रथवेटले २ र क्रिस गेलले १ विकेट लिए।
लामो ब्याटिङ लाइन भएको वेस्ट इन्डिजसामु २९२ रनको लक्ष्य सहज भएपनि सुरुमा दुई विकेट लिएर न्युजिल्याण्डले दबाब बनाएको थियो । क्रिस गेल र सिमरोन हेटमेरले आक्रामक ब्याटिङ गर्दै टोलीलाई सहज जिततर्फ लगेका थिए । त्यसपछि लगातार विकेट गुमी वेस्ट इन्डिजको इनिङ धरासायी हुँदा छैटौं नम्बरमा क्रिजमा आएका कार्लोस ब्रेथवेटले पारी सम्माली रहे ९ विकेट गुमिसकेको अवस्थामा पनि वेस्ट इन्डिज जित नजिक पुगेको थियो ।
४९ औं ओभरको अन्तिम बलमा ब्रेथवेटले गरेको प्रहार छक्काका लागि ब्राउन्डीतर्फ गइरहेका बेला ट्रन्ट बोल्टले क्याच गरी वेस्ट इन्डिजलाई निराश बनाए । बलले बाउन्ड्री पार गरेको भए वेस्ट इन्डिजले जित्ने थियो । वेस्ट इन्डिजका लागि ब्रेथवेटले ८२ बलमा १०२ रन बनाए । त्यसैगरी गेलले ८४ बलमा ८७ रन र हेटमेरले ४५ बलमा ५४ रन बनाउँदा अन्यले राम्रो प्रदर्शन गर्न सकेनन् । न्युजिल्याण्डका ट्रेन्ट बोल्टले ४ र लकी फार्गुसनले ३ विकेट लिए।
बलिङ र ब्याटिङ दुवैमा निकै बलियो देखिएको वेस्ट इन्डिजले ब्याट्सम्यानका खराब सटका कारण हार व्यहोर्दै आएको छ, पहिलो खेलमा पाकिस्तानमाथि सानदार जित निकाले वेस्ट इन्डिज त्यसपछिका खेलमा जितविहीन बनेको छ । अस्ट्रेलियाविरुद्ध जित नजिक पुगेर ४९ ओभरमा अलआउट भएको थियो । इङ्ल्याण्डविरुद्ध जम्मा २१२ बन बनाउँदा४५ औं ओभरमै सबै विकेट गुमाएको थियो।
जितपछि ६ खेलबाट ११ अंक बनाएको न्युजिल्याण्ड शीर्ष स्थानमा उक्लिएको छ । ३ अंकका साथ सातौं स्थानमा रहेको वेस्ट इन्डिजको भने सेमिफाइनल पुग्ने सम्भावना लगभग सकिएको छ।
प्रतिक्रिया दिनुहोस !
