नुवाकोट : नुवाकोटको विदुरमा किसानलाई कृषि उपकरण हस्तान्तरण गरिएको छ । बिदुर नगरपालिकाले किसानहरूको उत्पादन वृद्धिका लागि कृषि औजार र सिंचाई सामग्री हस्तान्तरण गरेको हो । बिदुर नगरपालिकाले प्याजको व्यावसायिक खेतीमा संलग्न विदुर नपा- ७ तुप्चेका कृषकलाई ५० प्रतिशत अनुदानमा कृषि औजार र सिंचाईका लागि आवश्यक सामग्री उपलब्ध गराएको हो ।
बिदुर नगरपालिकाका मेयर राजन श्रेष्ठ, उपमेयर प्रभा बोगटी, विदुर ७ का वडाध्यक्ष रबिन्द्र नेपाललगायतले किसानलाई ७ थान मिनिट्रिलर,८ थान स्प्रेयर र सिंचाईका लागि आवश्यक पाइप हस्तान्तरण गरेका हुन् । सामग्री हस्तान्तरण गर्दै मेयर श्रेष्ठले किसानको संरक्षणका लागि विदुर नगरपालिका सदा क्रियाशील रहेको बताए ।
उनका अनुसार साहुगाउँको करिब तीनसय रोपनी क्षेत्रफलमा व्यावसायिक रुपमा प्याज खेती सुरु गरिएको छ । विदुर नगरपालिकाको विशेष कार्यक्रमअन्तर्गत विदुर -७ को साहुगाउँमा ‘प्याज पकेट कार्यक्रम’ सञ्चालन गरिएपछि कृषकले प्याजको व्यवसायिक खेती सुरू गरेका हुन् ।
प्याजको व्यावसायिक खेतीका लागि विदुर नगरपालिकाले आवश्यक तालिम,बीउ र कृषि औजारको समेत प्रबन्ध गरिदिएपछि कृषक यसतर्फ आकर्षित भएका हुन् ।
प्रतिक्रिया दिनुहोस !
