मुग्लिन प्रहरीको विजोग
मुग्लिन : पृथ्वी राजमार्गको धादिङदेखि यता नारायणगढ मुग्लिन सडकसम्म केही भइहाले तत्काल जुट्ने जिम्मेवारी इलाका प्रहरी कार्यालय मुग्लिनको हो । सवारी दुर्घटना भइरहने र बेला–बेला पहिरो पनि खसिरहने जस्ता घटनाका कारण इलाका प्रहरी कार्यालय मुग्लिनका प्रहरी जवान २४ सै घण्टा अलर्ट अवस्थामा रहनुपर्छ । तर दिनरात नभनी खटिरहनुपर्ने यस प्रहरी युनिटका जवानको बासकै टुंगो छैन । १७ जना प्रहरी जवान कार्यरत युनिटका जवानले तीनवटा टेन्टमा रात कटाइरहेका छन् ।
पहिलेदेखि रहेको पुरानो भवन २०७२ सालको भूकम्पले क्षति पुर्याएपछि काम नलाग्ने भएको छ । बसोबासको समस्याका कारण यस कार्यालयका प्रहरी जवानको विजोग देखिजन्छ ।
‘जवानका लागि चाहिने जति टेन्ट पनि छैन,’ हालै मात्रै प्रमुखका रुपमा कार्यालय आएका प्रहरी निरीक्षक नवीन बुढाथोकीले भने–‘त्यो पनि चर्को गर्मीले गर्दा बी नसक्नु छ ।’ भूकम्पका बेला तत्काल अस्थायी क्याम्पका रुपमा सारिए पनि प्रहरी प्रधान कार्यालयले विकल्प नदिँदा चार वर्ष बितिसक्दा पनि प्रहरीहरुको बसोबास त्यही टेन्टमा भइरहको छ ।
ड्युटी सकेर पंखाको तातो हावासँगै आराम गरिरहेका जवान निराजन शाहीले भने,‘गर्मी त धानेकै छौं । पानी पर्दा पोखरी बन्छ ।’ यस क्षेत्रमा पानी परेकै बेला बढी घटना हुनेगर्छन् प्रहरीलाई त्यसबेला आफ्नो बास जोगाउने कि ? अरुको उद्धारमा खट्ने ? भन्ने दुविधा हुने जवान शाहीले बताए। गर्मीमा पंखा चलाउँदा पनि टेन्टमा बस्न कठिन छ । लाइन गएर त्यही पनि बन्द हुँदा झन कठिन हुन्छ । ‘लाइन गएपछि टेन्टमा बस्नै सकिन्न,’ अर्का जवान लक्ष्मण रानाभाटले भने,‘मच्छर धपाउँदै बाहिर निस्कनुपर्छ ।’
प्रहरी निरीक्षक बुढाथोकीले आउनासाथै नयाँ समस्याबारे थाहा पापछि उनलाई पनि चैन मिलेको छैन । उनले आफ्ना लागि भाडामा लिइएको आवास छाडेर जवानसँगै टेन्टमै बस्दै आएका छन् । समस्याबारे माथिल्ला निकायमा खबर गरेकाले उनी आशावादी भएको बताए
नयाँ भवनको प्रक्रिया थालिएको छः एसपी मल्ल
चितवनका प्रहरी उपरीक्षक दानबहादुर मल्लले कार्यालयको अवस्थाबारे जानकार रहेको बताए । उनले भने,‘चाँडै नयाँ भवनका लागि टेन्डर हुने जानकारी पाएको छु ।’ उनका अनुसार प्रदेश ३ प्रहरी मुख्यालयबाट नयाँ भवनका लागि स्टिमेट र टेण्डर हुँदैछ ।