गोरखा : गोरखा बारपाक सडक कालोपत्रे गर्ने काम ठेकेदारले तीन वर्षदेखि अलपत्र पारेको भन्दै शनिबार गोरखामा चक्काजाम गरिएको छ ।
गोरखा क्षेत्र नं. २ को ख बाट निर्वाचित सांसद प्रकाशचन्द्र दवाडीको नेतृत्वमा स्थानीयबासीले बिहान तीनघण्टा सडक जाम गरेका थिए । वडाध्यक्ष नारायण दानीका अनुसार मसानेठाँटीदेखि खहरेसम्मको खण्ड ठेक्का सम्झौता गरेको लामोसमयसम्म अलपत्र पारेको भन्दै स्थानीय स्तरमा गठित आन्दोलन समितिले शनिबारदेखि चरणवद्ध आन्दोलन सुरु गरेको उनले बताए ।
शनिबार बिहानदेखि सुरु भइ चक्काजाम ११ बजेसम्म भएको थियो । आन्दोलन समितिका संयोजक कञ्चनकुमार श्रेष्ठले भने, ‘सडक कालोपत्रेको प्रक्रिया सुरु नहुञ्जेल हामी चरणवद्ध आन्दोलनमा छौं, यो हप्ताभित्र प्रक्रिया सुरु नभए आउँदो २५ गते दिनभर चक्काजाम गर्ने र त्यसपछि पनि माग सम्बोधन नभए गोरखा बारपाक सडक नियमित बन्द गर्नेछौँ ।’
माग सम्बोधन नभए आँबुखैरेनी गोरखा सडकमा पनि चक्काजाम गर्ने उनले बताए । चक्काजामको समापन गर्दै सांसद दवाडीले सबै चरणको आन्दोलनमा आफू सहभागी हुने प्रतिवद्धता जनाएको सिरानचोक गाउँपालिका ६ का वडाध्यक्ष नारायण दानीले बताए ।
‘यो खण्डभन्दा अगाडि पनि कालोपत्रे भएको छ, पछाडि पनि कालोपत्रे भएको छ, यत्ति नौ किलोमिटर मात्र पाँच वर्षदेखि अलपत्र छ । हामीले सिडिओसाबलाई पनि समस्या राखेका थियौँ । सिडिओले ताकेता गर्दा पनि सुनुवाइ भएको छैन ।’
नागार्जुन त्रिशुली जेभी कन्स्ट्रक्शनले सो सडक कालोपत्रे गर्न एघारकिलो छेपेटार भालुस्वाँरा बारपाक सडक योजना कार्यालयसंग तीन वर्षअघि ठेक्का सम्झौता गरेको थियो । तर कत्ति पनि काम नगरेपछि गत साउनमा कार्यालयले ठेक्का रद्ध गरेको योजना कार्यालयका ईञ्जिनियर राजेश यादवले जानकारी दिए ।
मध्यपहाडी सडक अन्तर्गत पर्ने भएकाले सो खण्डको ठेक्का रद्ध गरी मध्यपहाडी सडक आयोजनालाई हस्तान्तरण गरेको यादवले बताए । मध्यपहाडी आयोजनाले पनि सो सडकखण्डको जिम्मा लिए पनि अहिलेसम्म नापजाँच गर्न नआएको, ठेक्का प्रक्रिया सुरु नगरेको स्थानीयबासीको गुनासो छ ।
‘एउटा कार्यालयले ठेक्का सम्झौता रद्ध गरेको छ । अर्कोले ठेक्का प्रक्रिया सुरु नै गरेको छैन’, आन्दोलन समितिका संयोजक श्रेष्ठले भने, ‘हिउँदभरि धुलो, बर्खाभरि हिलोले हामी हैरान भइसक्यौँ । अब पनि कालोपत्रे नभए बर्खामा गाडी गुड्दै सक्दैन ।’
मध्यपहाडी सडक आयोजनाको गोरखास्थित कार्यालयले भने अब छिट्टै ठेक्का प्रक्रिया सुरु गर्ने जनाएको छ । डिपिआर भइसकेको र अब केही दिनभित्र निर्देशनालयले ठेक्काको सूचना निकाल्ने गोरखा कार्यालयका प्रमुख रमेश दृष्टिले जानकारी दिए ।
प्रतिक्रिया दिनुहोस !
