सुर्खेत : भारतबाट सुर्खेत फर्किएका १०२ जनालाई वीरेन्द्रनगरस्थित एक होटल क्वारेन्टाइनमा राखिएको छ । जिल्ला प्रहरी कार्यालय सुर्खेतका अनुसार वीरेन्द्रनगर १० दैलेख रोडचोकमा रहेको होटल अशोकमा ७२ जनालाई र अन्तनिर्भर समाजको होस्टेलमा ३० जनालाई क्वारेन्टाइन राखिएको हो । होटलमा क्वारेन्टाइनका लागि २७ वटा कोठा भाडामा लिइएका छन् ।
होटल र होस्टेलभित्र क्वारेन्टाइनमा राखिएका नेपालका विभिन्न भन्सार नाकाबाट सुर्खेत भित्रिएका हुन् । उनीहरुको निगरानीका लागि होटलमै स्वास्थ्यकर्मीसहित सुरक्षाकर्मी परिचालन गरिएको कर्णाली प्रदेश सामाजिक विकास मन्त्री दलबहादुर रावतले बताए । उनका अनुसार होटल र होस्टेलमा क्वारेन्टाइन राखिएकाको सबै खर्च प्रदेश सरकारले व्यहोर्ने भएको छ ।
वीरेन्द्रनगरको खुलामञ्चमा क्वारेन्टाइन निर्माणाधिन अवस्थामा रहेकाले तत्कालका लागि होटलमा क्वारेन्टाइन राखिएको जिल्ला प्रहरी कार्यालयका सूचना अधिकारी गोपाल रायमाझीले बताए । उनका अनुसार लकडाउनको अवज्ञा गर्दै सडकमा जथाभावी हिड्नेलाई समेत प्रहरीले कारवाही गरिरहेको छ ।
सुर्खेतमा लकडाउनको समयमा चलाएका तीनसय ३५ बढी सवारी नियन्त्रणमा लिइएको छ । इलाका प्रहरी कार्यालय छिन्चु, लेकवेशी, बावियाचौर, प्रहरी पोष्ठ गोठीकाँडा, प्रहरी चौकी सुब्बाकुना र बड्डीचौरले सवारी साधन नियन्त्रणमा लिएको हो । कोरोना भाइरसको संक्रमण फैलिन नदिन र उच्च सतर्कता अपनाउन गरिएको लकडाउनका बेला नागरिकलाइ घर बाहिर ननिस्कन माइकिङ गर्न थालिएको हो ।
प्रतिक्रिया दिनुहोस !
