उदयपुर : उदयपुरका छुट्टा-छुट्टै ठाउँमा दुईदिन यता दुई बालिकासहित चारजनाको ज्यान गएको छ । स्थानीय त्रियुगा खोलाको दहमा माछा मार्ने क्रममा आफैले थापेको विद्युतीय एम्बुस (करेन्ट) लागेर घाइते भएका त्रियुगा नगरपालिका २ खैजनपुरका २४ वर्षीय ज्योतिकुमार राईको बुधबार ज्यान गएको हो । खोलाबाट उद्धार गरिएका राईको उपचारको क्रममा सिभिल अस्पताल गाईघाटमा ज्यान गएको जिल्ला प्रहरी कार्यालयका एसपी वीरबहादुर बुढामगरले जानकारी दिए ।
त्यसैगरी कपडा सुकाउने बाँसमा सलको पिङ बनाएर खेल्ने क्रममा लिम्चुङबुङ गाउँपालिका २ ताम्लिछा आमबोटका ललितसेर राईकी आठ वर्षीय छोरी करुण राईको बुधबार साँझ मृत्यु भएको एसपी मगरले जानकारी दिए । पिङ्ग खेल्ने क्रममा बाँसमा सल बेरिँदा उनको ज्यान गएको हो ।
एसपी बुढामगरकाअनुसार त्रियुगा नगरपालिका ७ चुहाडेकी १२ वर्षीया बालिका डिकमाया राई आफ्नै घरभित्र झुण्डिएको अवस्थामा बिहीबार फेला परेकी छिन् । त्यसैगरी उदयपुरगढी गाउँपालिका ५ हाडेवासका ४५ वर्षीय चन्द्रवहादुर तामाङको बिबीबार झुण्डिएको अवस्थामा फेला परेको एसपी मगरले जानकारी दिए ।
प्रतिक्रिया दिनुहोस !
