इलाम/ताप्लेजुङ : नेपाल–भारत साढे ५२ किमि खुला सिमाना रहेको इलाममा भारतबाट लुकिछिपी आउने नागरिकको लेखाजोखा गर्न स्थानीय सरकारलाई पनि समस्या परेको छ ।
रोङ गाउँपालिकाले मात्रै भारतको उडिसा, चेन्नाई, बंलोरलगायत क्षेत्रबाट आएका ८२ जनालाई विद्यालयमा क्वारेन्टाइन बनाएर राखेको छ । नाकामा जनप्रतिनिधि, स्थानीय र सुरक्षाकर्मीको निगरानी बढाइएको छ । वाड नं. ६ का अध्यक्ष सुवास सेङ्बोले विदेश गएका नागरिकका परिवारसँग प्रत्यक्ष सम्पर्कमा रहेर निगरानी गरिएको बताए । रोङमा मात्रै १२ किमि नेपाल–भारत सिमाना पर्छ ।
इलाम जिल्लाको सबैभन्दा बढी भारतसँग सिमाना जोडिएको सूर्योदय नगरपालिकामा ७ जनालाई पशुपतिनगरस्थित क्वारेन्टाइनमा राखिएको स्वास्थ्य उपसमिति संयोजक पेमा उर्गेन लामाले बताए । उनले वडास्तरीय समिति निर्माण गरेर विदेशबाट आउनेको निगरानी सुरु गरेको बताए । पशुपतिनगरमा तयार गरिएको १५ शड्ढयाका क्वारेन्टाइन व्यवस्था गरिएको छ । सूर्योदयमा ७५ जना विदेशबाट आएका नागरिक रहेको नगरपालिकाले जनाएको छ । सूर्योदय नगरपालिकामा समाल्बुङ, अन्तु, पशुपतिनगर, मानेभञ्याङलगायत नाका छन् । सन्दकपुर गाउँपालिकाले पनि सिमानामा निगरानी बढाएको छ । स्थानीय र सुरक्षाकर्मीले त्यसको निगरानी गरिरहेको गाउँपालिकाका प्रवक्ता गिरिराज खनालले बताए । सन्दकपुर गाउँपालिकाले ५० बेड क्षमताको क्वारेन्टाइन स्थापना गरेको उनले जानकारी दिए ।
चिवाभञ्ज्याङ र पशुपतिनगर नाका बन्द भएपछि भारतबाट नेपाल प्रवेश गर्नेले तिम्बुङ पोखरी छेउबाट मानिस ताप्लेजुङ प्रवेश गर्ने सम्भावना रहेको जनप्रतिनिधिहरू बताउँछन् ।
विदेशबाट गाउँ फर्किएका मानिस घरपरिवारसँग बसिरहेको मेरिङ्नेद गाउँपालिका–५ का वडाध्यक्ष जयबहादुर खड्काले सुनाए । ‘कामको सिलसिलामा भारत भएका ११ जना स्थानीय चैत ९ गते गाउँ फर्किएर परिवारसँगै बसेका छन्,’ खड्काले भने । भारतबाट फर्किएकाको स्वास्थ्य परीक्षण गर्ने तयारी गरिरहेको गाउँपालिकाको स्वास्थ्य शाखाका एचए उदय यादवले बताए ।
आफूले परिवारसँग नबसी छुट्टै बस्न बारम्बार भने पनि नमानेको उनको गुनासो छ । पछिल्लो एक सातामा आफ्नो गाउँपालिकामा १० जना मानिस बाहिरबाट आएको आठराई त्रिवेणी गाउँपालिकाका प्रमुख विश्वनाथ सिटौलाले बताए । स्वास्थ्यकर्मीका लागि व्यक्तिगत सुरक्षा सामग्री नहुँदा उनीहरूको परीक्षण गर्न समस्या रहेको सटौलाको भनाइ छ ।
प्रतिक्रिया दिनुहोस !
