कपिलवस्तु : कपिलवस्तु नगरपालिकावडा नं. १ ले निर्माण गरेका क्वारेन्टाइन जिल्लामै उदाहरणीय बनेको छ । तौलिहवाको आनन्दवागस्थित रत्न राज्यलक्ष्मी माविमा निर्माण गरिएको क्वारेन्टाइन १५ बेडको छ । सफा, स्वच्छ फिल्टर पानी, सफा शौचालय, निशुल्क तीव्र गतिको निशुल्क इन्टरनेट सेवा र स्वस्थ खाना तथा नास्ताको व्यवस्था क्वारेन्टाइनमा गरिएको छ । क्वारेन्टाइन बाहिर खुला चौर र सफा वातावरण छ ।
कोरोना भाइरसको संक्रमण फैलन नदिन भारत र तेस्रो मुलुकबाट आएका सर्वसाधारणलाई बस्नका लागि निर्माण गरिएको यो क्वारेन्टाइन जिल्लामै उत्कृष्ट रहेको प्रमुख जिल्ला अधिकारी दिर्घनारायण पौडेलले बताए । जिल्लाका विभिन्न नगरपालिका र गाउँपालिकाले निर्माण गरेका क्वारेन्टाइन बन्दीगृह जस्तै बनेका बेला कपिलवस्तु नगरपालिकाको वडा नं. १ ले निर्माण गरेको यो क्वारेन्टाइन सबैका लागि नमूनायोग्य पनि रहेको छ ।
भारतका विभिन्न सहरबाट आफ्नो वडामा फर्केका सर्वसाधारणलाई सहज ढंगबाट घरभन्दा पनि राम्रो सुविधासहित बस्न सक्ने गरी क्वारेन्टाइन निर्माण गरिएको वडाअध्यक्ष सुदीप पौडेलले बताए । सफा र सुविधाजन क्वारेन्टाइ नभए भारतबाट आउने सर्वसाधारण सजिलैसँग आफ्नै मनले आएर २ हप्ताक्वारेन्टाइनमा बस्न तयार हुन्छन्, 'वडा अध्यक्ष पौडेलले भने, 'क्वारेन्टाइन भनेको बन्दी गृह होइन । यहाँ बस्ने सर्वसाधारणलाई सबै खाले सुविधा दिनुपर्छ।'
भारतबाट आएका वडा नं. १ का सर्वसाधारणलाई २ हप्ता बस्न यो क्वारेन्टाइन निर्माण गरिएको हो । हाल १५ बेडबाट सुरु गरिए पनि यसरी क्वारेन्टाइनमा आउने सर्वसाधारणको संख्या बढ्न थाल्यो भने यसलाई विस्तार गरी ३० बेडहुँदै ६० बेडसम्म बढाउने योजना गरेको वडा अध्यक्ष पौडेलले बताए । क्वारेन्टाइन स्थलनजिकै विद्यालयको प्रांगणमा वडामा रहेका अति विपन्न व्यक्तिलाई खानपिनको व्यवस्थापनका लागि मेसको समेत तयारी गरिएको छ ।
दैनिक रोजगारी बन्द भएपछि घरमा चुल्हो बल्ने अवस्था नरहेका अति विपन्न वडाबासीका लागि मेसमा हरेक दिन बिहान र साँझ निशुल्क खानाको व्यवस्था गरिएको वडा अध्यक्ष पौडेलले बताए ।
जिल्लाका १० वटा स्थानीय तहले आ-आफ्नो तहमा ८ सय २२ वटा वेडसहितको क्वारेन्टाइन निर्माण गरेका छन् । जिल्ला प्रशासन कार्यालयले दिएको जानकारीअनुसार जिल्लाका १० वटै तहमा निर्माण गरिएको क्वारेन्टाइनमा गरी कुल ५ सय २० जनालाई राखिएको छ । सबैको अवस्था सामान्य रहेको छ।
प्रतिक्रिया दिनुहोस !
