रुकुम : रुकुम पश्चिममा एक युवा १७ दिनपछि मृत अवस्थामा फेला परेका छन् । १७ दिनअघि सम्पर्कविहीन भएका जिल्लाको मुसीकोट नगरपालिका–६ का २३ वर्षीय रमेश खड्काको शव बिहीबार फेला परेको प्रहरीले जानकारी दिएको छ ।
नगरपालिका–१ खौलीको भीरमा अड्केको अवस्थामा उनको शव फेला परेको जिल्ला प्रहरी कार्यालय रुकुम पश्चिमका प्रमुख प्रहरी नायव उपरीक्षक ठगबहादुर केसीले जानकारी दिए । युवालाई खोज्ने क्रममा बुधबार शव भेटिए पनि बिहीबार मात्रै निकालिएको उनले बताए । प्रहरी, आफन्त तथा स्थानीयले शव निकालेका थिए ।
शव गलिसकेको अवस्थामा भीरमा भेटिएको डिएसपी केसी बताए । उनको मृत्यु भएको कारण बारे भन्ने अनुसन्धान भइरहेको प्रहरीले बताएको छ ।
गत चैत्र १७ गते घरबाट बुबा र काकासँगै जंगल गएका उनी बेलुका घर नफर्केपछि सोही दिनदेखि नै खोजी सुरु भएको थियो । बाटोभन्दा अन्दाजी ९ सय मिटर तल उनको शव रहेको बताइएको छ ।
प्रतिक्रिया दिनुहोस !
