नेपाली सेनाद्वारा उदयपुरको संक्रमित क्षेत्रमा स्वाब संकलन
वैशाख ७, २०७७ आइतबार १७:५९:०
उदयपुर : कोरोना संक्रमित क्षेत्र उदयपुरको त्रियुगा नगरपालिका ३ भुल्केमा नेपाली सेनाको टोलीले स्थानीयको स्वाब संकलन सुरु गरेको छ । नेपाली सेनाको छाउनी अस्पतालका मेजर डा. प्राची रायमाझीको नेतृत्वमा आएको ४ जनाको टोलीले नमुना संकलन सुरु गरेको हो ।
नेपाली सेनाको हेलिकप्टरबाट आइतबार दिउँसो भुल्के आइपुगेको टोलीले शनिबार संकलन गरिएको स्थल १८ नम्बर वाहिनीको फिल्डमा नमुना संकलन सुरु गरेको स्वास्थ्य कार्यालय उदयपुरका प्रमुख मोहन सुवेदीले बताए ।
स्थिति भयाभह भएपछि जिल्लामा प्रतिनिधित्व गर्ने संघीय र प्रदेश सांसद, जिल्लास्थित राजनीतिक दल, जिल्ला समन्वय समिति, त्रियुगा नगरपालिका, स्थानीय प्रशासनको संयुक्त बैठकबाट केन्द्रीय सरकारसँग अनुरोध गर्ने निर्णय अनुसार सेनाको टोली आइपुगेको त्रियुगा नगरपालिकाका मेयर बलदेव चौधरीले जानकारी दिए ।
शनिबार प्रदेश नम्बर १ का जनस्वास्थ्य प्रयोगशालाका निर्देशक डा.जयवेन्द्र यादवको नेतृत्वमा आएको पाँच सदस्यीय स्वास्थ्यकर्मी टोलीले ५३ घरका ६० जनाको नमुना संकलन गरेपछि बाँकी रहेका स्थानीयको नेपाली सेनाका स्वास्थ्यकर्मी टोलीले स्वाब संकलनका लागि आएको थियो ।
सेनाको टोलीले करिब २ सय ५० जनाको स्वाब संकलन गर्ने जनाएको छ । खुल्ला चौरमा सामाजिक दुरी कायम गर्दै व्यवस्थित रुपमा पालैपालोले स्वाब नमुना संकलन गरिएको छ । संक्रमणको हिसावले देशकै अग्रभागमा उदयपुर जिल्ला परेपछि भाइरस नियन्त्रणका लागि नेपाल सरकारले नेपाली सेनालाई परिचालन गरेको हो ।
शनिबार मात्र र्यापिड टेस्टको विश्वास नभएपछि प्रदेश नम्बर १ को सामाजिक विकास मन्त्रालयले टोली पठाएको हो । र्यापिड टेस्टमा १६ जनाकै नेगेटिभ र स्वाब टेस्टमा १३ जनाको पोजेटिभ देखिएपछि प्रदेशले विज्ञसहितको टोली परिचालन गरेको थियो ।
संक्रमण फैलिएको मस्जिद वरपरका सवैको स्वाब परीक्षण गरी विराटनगरस्थित कोसी अस्पतालमा परीक्षणका लागि पठाइएको स्वास्थ्य प्रमुख सुवेदीले बताए । उनले मस्जिद वरपरका सवैको स्वाब संकलन गर्दै जाने र संक्रमितहरुसँगको सम्पर्कमा पुगेको व्यक्तिहरूको ट्रयाकिङ गरी उनीहरुको पनि स्वाब नमूना लिइने जानकारी दिए ।
कोरोना संक्रमण पुष्टि भएपछि भुल्के बस्तीलाई शनिबार रातिबाट सुरक्षाकर्मीले निगरानीमा राखेका छन् । बस्तीलाई नेपाल प्रहरी र सशस्त्र प्रहरीले घेरा हालेर आउजाउ गर्न नदिएको सहायक प्रमुख जिल्ला अधिकारी भीमप्रसाद भट्टराईले जानकारी दिए ।
प्रतिक्रिया दिनुहोस !
