काठमाडौं : कोरोना भाइरस (कोभिड–१९) को संक्रमण दिन प्रतिदिन बढ्दै गइरहेको बेलामा विद्यालय कहिले खुल्ने कुनै टुङ्गो छैन । रोकिएको एसईई पनि कहिले हुने यसै भन्न सक्ने अवस्था छैन । यस विषयमा शिक्षा मन्त्रालय पनि मौन जस्तै छ । जसको प्रत्यक्ष असर विद्यार्थीहरूमा परेको छ । उनीहरू निकै चिन्तित छन् । दुखी छन् ।
सोमबार बेलुका कीर्तिपुर नगाउँ चोकमा केही बालबालिकाहरू ब्याटमिन्टन खेल्दै थिए । कोही झोक्राएर बसेका थिए । कीर्तिपुर नगाउँस्थित क्रिएटिभ एकेडेमीमा अध्ययनरत प्रतिमा महर्जन एसईईको तयारीमा जुटेकी थिइन् । कोरोनाले सबथोक बर्बाद गरेको बताउँछिन् उनी । ‘यो कोरोनाले हाम्रो भविष्य नै बिगार्ला जस्तो छ,’ उनी चिन्तित हुँदै भनिन्, ‘यसले हाम्रो एक वर्ष लस हुने भयो । साह्रै दुःख लागेको छ ।’ लकडाउन भएको केही दिनसम्म स्कुलले अनलाइन कक्षा सञ्चालन गरे पनि सबैजना उपस्थित हुन नसकेपछि बन्द भएको बताइन् । उनले भन्छिन्, ‘अनलाइन कक्षा पनि बन्द भयो अब एक्कासी एसईई हुन्छ भन्ने खबर आयो भने के गर्ने होला । यो महामारी छिट्टै हराओस् भन्ने उनको चाहना छ ।’
कीर्तिपुर माविमा कक्षा ३ मा पढ्छन् सुमित कुमार । उनी भारत फुलवारका हुन् । कोठामा बसेर दिक्क लागेपछि एकछिन चोकमा साथीहरूसँग व्याटमिन्टन खेल्न निस्किएका थिए उनी । उनलाई घरमाभन्दा स्कुलमा खेल्न मनपर्छ । ‘दिउँसो घरमा कथाहरू पढ्छु, अनि साँझतिर यहाँ खेल्न आउँछु,’ उनी भन्छन् ‘मलाई घरमाभन्दा स्कुलमा खेल्न रमाइलो लाग्छ । त्यहाँ धेरै साथीहरू हुन्छन् । स्कुल खुल्ने बित्तिकै म स्कुल गएर साथीहरूसँग खेल्छु ।’
लकडाउनका कारण स्कुल जान नपाएर सबै दुखी भएको बेला मंगल मावि कक्षा ६ मा पढ्ने दृष्टि महर्जन भने मख्ख छिन् । ‘मलाई त घरमा बस्न आनन्द छ । आमाबुवाले पनि केही भन्दैनन् । स्कुल अझै नखुले हुन्थ्यो,’ उनी भन्छिन्, ‘सबैजना उपस्थित हुन नसक्ने भएपछि अनलाइन कक्षा पनि भएन हाम्रो त, ठीकै भयो ।’
४ वर्षीया प्रकृति महर्जन आफ्नो आमासँगै बसेकी थिइन् । ‘ममी हाम्रो स्कुल कहिले खुल्छ ?’, क्रिएटिभ एकेडेमी यूकेजीमा पढ्ने प्रकृति आमालाई सोध्दै थिइन् । उनको पढाइ अनलाइनमार्फत् हरेक दिन २ घण्टा हुन्छ । तर, उनलाई अनलाइनभन्दा स्कुलमै गएर पढ्न मनपर्छ त्यसैले दिनका दिन सोधिरहन्छिन्, उनी । अनलाइनबाट पढ्दा नबुझ्ने हुनाले पढ्न मन नलाग्ने बताउँछिन् उनी । स्कुल नखुलेर छोराछोरीको पढ्ने बानी बिग्रिन्छ कि भन्ने डर भएको बताउँछिन् प्रकृतिकी आमा । उनी भन्छिन् ,‘यो महामारी छिटै जाओस् र छोराछोरीले पढ्न पाऊन् ।’
सुर्खेतका मौसम धमला पुष्प सदनमा अध्ययनरत छन् । कक्षा ८ पास गरेर ९ मा पढ्ने धोको यो वर्ष पूरा होला कि नहोला भन्ने पीरमा छन् उनी । दिनभरि मोबाइलमा गेम खेलेर दिन बिताउने गर्छन् । ‘यो लकडाउन यस्तै रहिरह्यो भने पढ्ने बानी बिग्रिएला भन्ने डर छ,’ भन्छन् ‘भोलिदेखि अनलाइन कक्षा सुरु हुने भनेका छन्, त्यसैले खुशी छु ।’
बाजुराका आशिष खत्री कक्षा ५ पढेर ६ मा पढ्ने भनेर काठमाडौं आएका थिए । तर, भर्ना पनि नभइकनै घर फर्किनुपर्ला भन्ने चिन्तामा छन् । भन्छन्, ‘काठमाडौं पढ्ने भनेर खुशी भएर आइयो । यो कोरोनाले सबै बिगारिदियो । भोलि घर जाँदैछौ । अब आउन पाउँछु कि पाउँदिन थाहा छैन ।’
प्रतिक्रिया दिनुहोस !
