राजविराज : सप्तरीमा ६ र सिराहा जिल्लामा ८ गरी कुल १४ जना कोरोना संक्रमित थप भएका छन् । राजविराजस्थित गजेन्द्रनारायण सिंह अस्पतालको प्रयोगशालामा गरिएको परीक्षणमा सप्तरीको तिलाठी कोइलाडी गाउँपालिका-२ लौनियाका एक संक्रमित थप भइ सो वडामा मात्र संक्रमितको सङ्ख्या ४३ पुगेको स्वास्थ्य कार्यालय सप्तरीले जनाएको छ ।
अस्पतालका अनुसार तिलाठी कोइलाडी गाउँपालिका-२ का ४२ वर्षीय, डाकनेश्वरी नगरपालिका-६ का २५ वर्षीय, हनुमाननगर कंकालिनी नगरपालिका- ६ का ३४ वर्षीय, वडा नम्बर ९ का २७ वर्षीय, वडा नम्बर- १० का ३० वर्षीय र वडा नम्बर-१२ का ४५ वर्षीय पुरुष कोरोनाबाट संक्रमित भएका हुन् ।
यो समेत सप्तरीमा कोरोना संक्रमितको संख्या ५८६ पुगेको छ । जसमा ६७ जना महिला छन् भने संक्रमितमध्ये राजविराज-५ का ७३ वर्षीय र रुपनी गाउँपालिका-५ का ४२ वर्षीय पुरुषको मृत्यु भएको छ ।
यसैगरी राजविराजस्थित अस्पतालको प्रयोगशालामा गरिएको परीक्षणमा सिरहा जिल्लाको सुखीपुर नगरपालिकाको एकै वडाका सात जनामा कोरोना संक्रमण देखिएको छ ।सुखीपुर नगरपालिका- ९ का २१, २२, २६, २८, २९, ३५ र ४२ वर्षीय पुरुषमा कोरोना संक्रमण देखिएको अस्पतालले जनाएको छ । सोही नगरपालिकाको वडा नम्बर २ मा २५ वर्षीय पुरुषमा समेत कोरोना संक्रमण पुष्टि भएको छ ।
स्वास्थ्य तथा जनसङ्ख्या मन्त्रालयले मंगलबार यसको पुष्टि गर्ने तयारी गरेको छ । यो समेत सिरहामा कोरोना संक्रमितको संख्या २३३ पुगेको स्वास्थ्य कार्यालय सिरहाले जनाएको छ । जसमा २१ जना महिला छन् भने संक्रमितमध्ये गोलबजार १२ का २३ वर्षीय पुरुषको मृत्यु भएको छ ।
सप्तरीको राजविराजमा ११२, तिलाठी कोइलाडी गाउँपालिकामा ८९, हनुमाननगर कंकालिनी नगरपालिकामा ६६, बलान बिहुल गाउँपालिकामा ५४, बोदे बर्साइन नगरपालिकामा ४३, छिन्नमस्ता गाउँपालिकामा ३५, राजगढ गाउँपालिकामा २९, डाक्नेश्वरी नगरपालिकामा २७ र सुरुङ्गा नगरपालिकामा २१ जना संक्रमित छन् ।
यस्तै महादेवा गाउँपालिकामा २०, खडक नगरपालिकामा १९, अग्नीसाइर कृष्णसवरण गाउँपालिकामा १३, तिरहुत गाउँपालिकामा १२, शम्भुनाथ नगरपालिकामा र सप्तकोशी नगरपालिकामा ११-११, रुपनी गाउँपालिकामा ९, बिष्णुपुर गाउँपालिकामा ६ र कञ्चनरुप नगरपालिकामा ५ जना संक्रमित पुष्टि भइसकेका छन् ।
प्रतिक्रिया दिनुहोस !
