राजविराज : प्रहरीले सप्तरी जिल्ला अदालतबाट फैसला भइ फरार रहेका १४ जना अभियुक्तलाई एकै दिन पक्राउ गरेको छ । दण्डहीनताविरूद्धको अभियानअन्तर्गत सप्तरी जिल्ला अदालतबाट कैद तथा जरिवाना फैसला भएका अभियुक्त पक्राउ गरिएको सप्तरी प्रहरी प्रवक्ता एवम् डिएसपी तिलक भारतीले बताए ।
पक्राउ पर्नेमा ३५ वर्षदेखि ९८ वर्षसम्मका अभियुक्त रहेका छन् । सप्तरी प्रहरीका अनुसार कुटपिट मुद्दामा फरार राजविराज–१ का ९८ वर्षीय उतिमलाल यादव, ज्यान मार्ने उधोग र कुटपिट मुद्दामा राजविराज–९ का ७६ वर्षीय झौली नुनिया, लुटपिट मुद्दामा राजबिराज–१ का ७५ वर्षीय गोसाई यादव पक्राउ परेका छन् । उतिमलालविरुद्ध अदालतले २०६९ माघ १८ गते, नुनियाविरुद्ध २०५१ माघ २९ गते र गोसाईविरुद्ध २०६९ वैशाख १८ गते फैसला गरेको थियो ।
अन्य पक्राउ पर्नेमा कुटपिट अंगभंग मुद्दाका फरार राजविराज–९ का सुबंश साह र उनकी श्रीमती लिलावती साह रहेका छन् । कुटपिट मुद्दामा राजविराज–१ का ४५ वर्षीय शंकरकुमार यादव र उनका भाइ ३५ वर्षीय लक्ष्मण यादव पनि पक्राउ परेका छन् । साह दम्पतिविरुद्ध अदालतले २०७० मङ्सिर १७ गते र यादव दाजुभाइविरुद्ध २०६९ वैशाख १८ गते फैसला सुनाएको थियो ।
यसैगरी कुटपिट मुद्दामा राजबिराज–१ का शत्रुधन यादव, सोही वडाका ३० वर्षीय लक्ष्मी यादव, राजविराज–९ का ४४ वर्षीय गुलाबलाल दास, सोही वडाका ४५ वर्षीय जुक्ति यादव र ६६ वर्षीय सुबी यादव रहेको सप्तरी प्रहरीले जनाएको छ ।
शत्रुधन र लक्ष्मीविरुद्ध अदालतले २०६९ वैशाख १८ गते, गुलाबविरुद्ध २०७१ असार १३ गते, जुक्तिविरुद्ध २०६६ माघ १८ गते र सुबीविरुद्ध २०६६ वैशाख ९ गते फैसला गरेको थियो ।
केही सार्वजनिक अपराध मुद्दामा अदालतको ०७३ साउन १३ गतेको फैसलाबमोजिम राजबिराज नगरपालिका–१ का ४८ वर्षीय बडेलाल यादव र जालसाजी मुद्दामा ०६७ चैत १६ गतेको फैसलाबमोजिम राजबिराज–६ का ५६ वर्षीय झबर यादव पक्राउ परेको डिएसपी भारतीले बताए ।
अदालतबाट कैदसजाय र जरिवानाको फैसला भएपनि फैसला कार्यान्वयन नगरी घरमै लुकिछिपी बसिरहेका उनीहरूलाई इन्स्पेक्टर सन्तोष खड्काको नेतृत्वमा खटिएको प्रहरी टोलीले पक्राउ गरी आवश्यक कारबाहीको लागि बिहीबार सप्तरी जिल्ला अदालतमा उपस्थित गराइएको छ ।
प्रतिक्रिया दिनुहोस !
