धनगढी : कैलालीमा केराउ तस्करी रोकेको भन्दै दुईजना प्रहरीको हत्याका मुख्य योजनाकार पक्राउ परेका छन् । घटना भएकै दिनदेखि फरार रहेका धनगढी उपमहानगरपालिका वडा नम्बर १० जुगेडाका ३४ वर्षीय सुकबहादुर भनिने अमर रानालाई आइतबार राती साढे ७ बजे पक्राउ गरिएको हो ।
उनलाई, धनगढी उपमहानगरपालिकाकै वडा नम्बर १९ को फुलबारी क्षेत्रबाट पक्राउ गरिएको कैलालीका प्रहरी उपरीक्षक अनुप समसेर जबराले बताए । प्रहरीले, सोमबार विहान पत्रकार सम्मेलनको आयोजना गर्दै रानालाई सार्वजनिक पनि गरेको छ ।
कार्तिक १ गते राती १० बजेतिर धनगढी उपमहानगरपालिका वडा नम्बर १० मा पर्ने नेपालभारत सीमाना नजिक गस्तीमा गएका, अस्थायी प्रहरी पोस्ट जुगेडाका प्रहरी सहायक निरीक्षक गोविन्द विक र प्रहरी जवान रामबहादुर साउदको हत्या गरिएको थियो ।
प्रहरीले, तेस्रो मुलुकबाट ल्याएका केराउ तस्करीमा कडाई गर्दै आएको थियो । नेपालमा किलोको ६५ रुपैयाँ पर्ने केराउ भारतमा किलोको एक सय भन्दा पनि महंगो बेचिन थालेपछि सीमानामा तस्करी बढेको थियो ।
अस्थायी प्रहरी चौकी जुगेडामा कार्यरत प्रहरी सहायक निरीक्षक विक र जवान साउदको तस्करहरुको समूहसँग सीमानामै जम्का भेट भएको थियो । प्रहरीले बरामद गरेको केराउ नछोडने भन्दै चौकीतिर ल्याउन थालेपछि अमर रानाकै निर्देशनमा हत्या भएको कैलाली प्रहरीले जनाएको छ ।
यस्तो थियो हत्याको योजना
कार्तिक १ गतेको बेलुकी करिब १० क्विन्टल केराउ भारत तस्करीका लागि सुकबहादुर भनिने अमर रानाले आफ्ना समूहका १०/१५ जनालाई भरियाका रुपमा बोलाए । त्यसअघि चौकी इञ्चार्ज गोविन्द विकले तस्करीको सामान बरामद गर्न थालेका थिए । उनले केराउ बरामद गर्न अझ बढी जोड दिएका थिए।
किनकी तेस्रो मुलुकबाट नेपालका लागि भनेर आयात भएको केराउ भारत निकासी गर्न पाइदैन । विभिन्न मिडियामा केराउ तस्करीको समाचार आएका कारण पनि जुगेडाका असइ विकलाई केराउ तस्करी नियन्त्रणका लागि हाकिमहरुको निर्देशन थियो ।
प्रहरीले तस्करीमा कडाई गरेपछि अमर रानाको समूह हैरान थियो । कार्तिक १ गते प्रहरीलाई ठोकेरै भएपनि माल पास गराउने योजना अमर रानाको घरमा बन्यो । अमर, केराउ किनेर भरिया लगाउँदै सीमापार पुगाउने मुख्य तस्कर हुन् ।
उनी नेपालबाट किन्नका लागि भारतीय व्यापारीको रकम ल्याउने र बीचको मार्जिन बचाएर सामान पठाउने व्यक्ति हुन्। कार्तिक १ गते को केराउ तस्करीमा अमरकै गोरु र गोरुगाढा प्रयोग भएको छ ।
प्रहरीको हत्यामा प्रयोग गरिएका उनकै घरको फरुवा, कुटो बञ्चरो, बगडी, दारु र लाठीहरु प्रहरीले बरामद भएको छ । त्यसदिन अमरको सूह पहिला सीमा क्षेत्रमा गस्ती छ की छैन भनेर रेकी गर्न गयो । त्यहाँ प्रहरी देखिएन । अनी अमरको घरबाट केराउ बोकेको गोरुगाढा सीमातिर लाग्यो ।
सीमानामा पुग्ने वित्तिकै लुकेर बसेका असइ विक र जवान साउदले केराउको गाडा समाति हाले । प्रहरीलाई छोडन अनुनयविनय भयो र प्रहरीले मानेन । केराउ बोकेको गाडा चौकीतिर ल्याउन सुरु गर्ने वित्तिकै प्रहरीमाथि घरेलु हतियारले आक्रमण भयो ।
घटनास्थलबाट भागेका असइ विक र जवान साउदलाई दुई समूहले लखेटी लखेटी हत्या गरे । उनीहरुको हत्या भएपछि अमरको नेतृत्वमा गाडाको मटर भारत पुग्यो । अमर फेरि नेपालतिरको सीमानामा आए । त्यसअघि तस्कर समूहका अरु व्यक्तिले शव मोहना नदीमा गाडिसकेका थिए । अमरको नेतृत्वमा थप प्रमाणहरु नष्ट गर्ने काम भयो ।
त्यसपछि अमरकै घरमा फर्केका उनीहरु बीच यो कुरा कसैले कसैलाई नभन्ने र नभाग्ने निर्णय भयो । तर सुकबहादुर भनिने अमर राना एकाबिहानै घरबाट भागेका थिए । प्रहरीले मुख्य योजनाकार भनिएका अमर रानाको खोजी गरिरहेको थियो । त्यसैक्रममा उनी आइतबार राती पक्राउ परेका हुन्।
यसअघि प्रहरीले ८ जनालाई पक्राउ गरी अनुसन्धान सकेको छ । आइतबार पक्राउ परेका सुकबहादुरसहित ९ जनालाई मुलुकी फौजदारी संहिताको दफा ४१ (क) बमोजिम आजीवन कारावासको सजाय दाबी गरिएको छ ।
प्रतिक्रिया दिनुहोस !
