भक्तपुर : भक्तपुरको सूर्यविनायक नगरपालिकाले कोरोना भाइरसविरुद्धको चिनियाँ खोप भेरोसेलको दोस्रो मात्रा मंगलबारदेखि दिने भएको छ। उसले जेठ ४ देखि ११ गतेसम्म आफ्नो नगर क्षेत्रका बासिन्दालाई दोस्रो मात्रा दिने तयारी गरेको हो।
नपाका स्वास्थ्य संयोजक विक्रम मगरले वैशाख ४ देखि १४ गतेसम्म पहिलो मात्रा लगाएकालाई उक्त दिनभित्र नपाका प्रत्येक वडामा दोस्रो मात्रा दिइने जानकारी दिए।
उनका अनुसार सूर्यविनायक नपाका ९ वटै वडामा रहेका स्वास्थ्य चौकी तथा नगरपालिका अस्पतालले खोपको दोस्रो मात्रा दिनेछन्।
भक्तपुरमा सबैभन्दा पहिले मध्यपुर थिमि नपाले जेठ २ गतेदेखि खोपको दोस्रो मात्रा दिएको थियो। यहाँ पनि ९ वटै वडामा रहेका स्वास्थ्य चौकी, सहरी स्वास्थ्य क्लिनिक, अस्पताल र वडा कार्यालयहरुमा खोप दिँदै आएको नपाका सूचना अधिकारी केशव सिलवालले जानकारी दिए।
उनका अनुसार मध्यपुर थिमि नपामा जेठ २ देखि ११ गतेसम्म दोस्रो मात्राको खोप दिइनेछ। यहाँ गएको वर्ष चैत २५ देखि वैशाख १५ गतेसम्म पहिलो मात्रा दिइएको थियो।
स्वास्थ्य कार्यालय भक्तपुरका अनुसार मध्यपुर थिमिमा पहिलो दिन जेठ २ गते ७६० जनाले भेरोसेलको दोस्रो मात्रा लगाएका थिए। जसमा पुरुष ५२२ जना र महिला २३८ जना रहेको कार्यालयका प्रमुख कृष्ण मिजारले जानकारी दिए। उनका अनुसार जेठ ३ गते ६३० जना पुरुष र ३८० जना महिला गरी एकहजार १० जनाले दोस्रो मात्रा लगाए।
भक्तपुरका ४ नपामध्ये चाँगुनारायण नपाले जेठ ५ र भक्तपुर नपाले जेठ ६ गतेदेखि भेरोसेल खोपको दोस्रो मात्रा दिने तयारी गरेका छन्। चाँगुनारायण नपाका ९ वटा वडामा रहेका स्वास्थ्य चौकी र सहरी क्लिनिकमा खोप केन्द्र निर्धारण गरिएको छ। उसले जेठ ५ देखि १३ गतेसम्म सबै खोप केन्द्रहरुबाट खोप दिने तालिका सार्वजनिक गरेको छ। यहाँ वैशाख ५ देखि १३ गतेसम्म भेरोसेल खोपको पहिलो मात्रा दिइएको नपाका जनस्वास्थ्य अधिकृत सत्यकुमार दुवालले जानकारी दिए।
भक्तपुर नपाले भने निर्वाचन मतदान केन्द्र र खुला क्षेत्रलाई खोप केन्द्र तोकेका छन्। भक्तपुर नपामा जेठ ६ देखि १७ गतेसम्म खोप दिने तालिका बनाइएको छ। यसबीचमा छुटेकालाई भने १८ गते लगाइने भक्तपुर नपाले जनाएको छ।
भक्तपुर नपामा वैशाख ४ देखि १५ गतेसम्म खोपको पहिलो मात्रा दिइएको थियो। भक्तपुरमा सोमबार ३३९ जना नयाँ संक्रमित थपिएका छन्। यससँगै यहाँ सक्रिय संक्रमितको संख्या ५ हजार १८९ जना पुगेका छन्। अहिलेसम्म संक्रमण पुष्टि हुने संख्या १७ हजार ९ सय ७१ पुगेको स्वास्थ्य कार्यालयले जनाएको छ।
प्रतिक्रिया दिनुहोस !
