भक्तपुरमा भयावह बन्दै कोरोना : प्रत्येक ४ घन्टामा एक संक्रमितको मृत्यु
जेठ ९, २०७८ आइतबार १४:२९:०
भक्तपुर : भक्तपुरमा पुनः कोरोना भाइरस संक्रमितको निरन्तर मृत्यु हुन थालेको छ । स्वास्थ्य कार्यालय भक्तपुरको तथ्यांकले यहाँ प्रत्येक ४ घन्टामा एकजना संक्रमितको मृत्यु भएको देखाउँछ । गएको ४८ घन्टामा यहाँका १२ संक्रमितले ज्यान गुमाए ।
कार्यालयका प्रमुख कृष्ण मिजारका अनुसार पछिल्लो ४८ घन्टामा सूर्यविनायक नपाका ३ महिला र २ पुरुष गरी ५ संक्रमितको मृत्यु भयो । भक्तपुर नपाका २–२ जना महिला र पुरुष गरी ४ जना संक्रमितले ज्यान गुमाए ।
त्यस्तै मध्यपुर थिमि नपाका एकएक महिला र पुरुष गरी २ जना तथा चाँगुनारायण नपाका एक महिला संक्रमितको मृत्यु भएको प्रमुख मिजार बताउँछन् ।भक्तपुरमा कोरोना भाइरस संक्रमणका कारण मर्नेको संख्या २२५ पुगेको छ । यहाँका ४ नपामध्ये सबैभन्दा बढी मध्यपुर थिमि नपाका ५७ जना पुरुष र २४ महिला गरी ८१ जना संक्रमितको मृत्यु भएको छ ।
भक्तपुरका नपाका ३७ पुरुष र २५ महिला गरी ६२ संक्रमितको मृत्यु हुँदा सूर्यविनायक नपाका ३७ पुरुष र २१ महिला गरी ५८ जनाले ज्यान गुमाएका छन् ।यहाँ सबैभन्दा कम चाँगुनारायण नपाका १६ जना पुरुष र ८ जना महिला गरी २४ जना संक्रमितको मृत्यु भएको स्वास्थ्य कार्यालय प्रमुख मिजारले जानकारी दिए ।
सक्रिय संक्रमित ४ हजार १२० जना
उनले भक्तपुरमा अझै ४ हजार १२० जना सक्रिय संक्रमित रहेको बताए । जसमध्ये ५.६७ प्रतिशत अर्थात १३८ जना पुरुष र ९६ जना महिला गरी २३४ जना अस्पताल एवं नपाको आइसोलेसन केन्द्रमा रहेको उनको भनाइ छ ।
स्वास्थ्य कार्यालयका अनुसार कुल संक्रमितको ९४.३३ प्रतिशत अर्थात २ हजार ४५ जना पुरुष र एकहजार ८४१ जना महिला होम आइसोलेसनमा छन् । यहाँका ४ नपामध्ये सबैभन्दा बढी मध्यपुर थिमिमा एकहजार ३१२ जना सक्रिय संक्रमित रहेका छन् । सूर्यविनायकमा एकहजार २८९ जना, भक्तपुरमा ६७० जना र चाँगुनारायण नपामा ५५९ जना सक्रिय संक्रमित छन् ।
७६ प्रतिशत संक्रमित डिस्चार्ज
भक्तपुरमा पछिल्लो समय डिस्चार्ज हुने संक्रमितको संख्या बढेको छ । स्वास्थ्य कार्यालयका प्रमुख मिजारले शनिबार २८३ जना नयाँ संक्रमित थपिँदा ४२९ जना डिस्चार्ज भएको बताए । तर समग्रमा भक्तपुरका कुल संक्रमितमध्ये ७६ प्रतिशतमात्रै डिस्चार्ज भएका छन् । जसअनुसार ७ हजार ६३७ जना पुरुष र ६ हजार १४२ जना महिला गरी १३ हजार ७७९ जना संक्रमित डिस्चार्ज भएका हुन् ।
शनिबार एकैचोटि ४२९ जना डिस्चार्ज भएपछि भक्तपुरमा डिस्चार्ज हुने संक्रमितको संख्या बढेको देखिएको हो । तर शुक्रबारसम्म भक्तपुरमा डिस्चार्ज हुने संख्या ७३ प्रतिशतमात्रै थियो ।भक्तपुरमा कोरोना भाइरस संक्रमण पुष्टि हुने संख्या १८ हजार १२४ पुगेको छ । जसमा ९ हजार ९६७ जना पुरुष र ८ हजार १५७ जना महिला रहेका छन् ।
प्रतिक्रिया दिनुहोस !
