बेनी : म्याग्दीको रघुगंगा गाउँपालिका–२ भगवतिको साझापानीका युवाहरु कोरोना (भाइरस) संक्रमण नियन्त्रणका लागि गरिएको निषेधाज्ञामा फुर्सदको समयलाई विकासमा लगाएका छन् । अध्ययन, पेशा, ब्यवसाय गर्न बजारमा बस्दै आएका युवाहरु गाउँ फर्किएर सिचाइ आयोजना निर्माणमा जुटेका हुन् ।
साझापानीका युवाहरुले कोरोनाबाट जोगिएर निषेधाज्ञाको फुर्सदको समयलाई रुइसे सिचाई आयोजना निर्माणमा उपयोग गरेका आयोजनाका सचिव रमेश भण्डारीले बताए । ‘सामान्य अवस्थामा विकास निर्माण र खेतीबाली लगाउन मजदुरको अभाव हुने गरेको थियो,’ उनले भने ‘निषेधाज्ञाले गाउँका युवाहरु फुर्सदिला भएकाले सबैलाई अवसर दिन समूह बनाएर काममा लगाइएको छ ।’
१५/१५ जनाको तीनवटा समूह बनाएर स्वास्थ्य सुरक्षा मापदण्ड पालना र दुरी कायम गरेर तीन/तीन दिनका दरले नहर निर्माणमा परिचालन गरेको छ । रोजगारी सिर्जना, आम्दानीको अवसरका साथै उपभोक्ता समितिलाई बाहिरबाट मजदुर ल्याउनुपर्ने समस्या हटेको छ ।
खानेपानी, जलस्रोत तथा सिँचाइ विकास डिभिजन कार्यालय म्याग्दी मार्फत चालु आर्थिक वर्ष २०७७/०७८ मा बिनियोजन भएको २८ लाख ८७ हजार र उपभोक्ताको तीन लाख सात हजार रुपैयाँ बराबरको श्रमदानबाट आयोजना निर्माण हुन लागेको हो । ४४५ मिटर नहर, ४०० मिटर पाइप जडान, ७ वटा कलेक्सन च्याम्बर र १ वटा विपिटी निर्माण गर्ने लक्ष्य छ ।
पाइप जडान, कलेक्सन च्याम्बर, पिपिटी र खरभिर खण्डमा ३५० मिटर नहर निर्माण भइसकेको छ । रुइसेमा मुहान भएको यस आयोजना गत आर्थिक वर्षदेखि निर्माण सुरु भएको थियो । पहिलो वर्ष कार्यालयको १९ लाख २१ हजार ७३० अनुदान र उपभोक्ताको दुई लाख १७ हजार रुपैयाँ बराबरको श्रमदानमा मुहानमा इन्टेक, नौलीबराहमा १ वटा कलेक्शन च्यामबर र २८५ मिटर नहर निर्माण भएको कार्यालयका इञ्जिनियर अञ्जन खत्रीले बताए ।
‘आगामी आर्थिक वर्षमा निर्माण सम्पन्न गर्ने लक्ष्य राखिएको आयोजनाको नहरमा पानी चलाएर सिचाई गर्न सकिन्छ,’ उनले भने ‘भगवतिको साझापानी, बुझबुझे, सान्ते, देउपुर्ण, तिबाङ र दोब्तागैराको १९ हेक्टर क्षेत्रफलमा सिचाई सुबिधा पुग्छ ।’
सिचाईको अभावमा आकाशे पानीको भरमा खेतीबाली लगाउनुपर्ने समस्या थियो । सिँचाइ असुविधाले बाझिएका जमिन प्रयोगमा आउने र नियमित खेती गर्न पाउने रुइसे सिँचाइ आयोजनाका अध्यक्ष कमल भण्डारीले बताए ।
यसैगरी भगवतिको छिमेकी वडा पिप्लेमा करिब रु. पचास लाखमा निर्माण भएको पिप्ले सिँचाइ आयोजना सञ्चालनमा आएपछि डेढ सय घरधुरी कृषकको एक हजार रोपनी भन्दा बढी जमिनमा सिँचाइ सुविधा पुगेको छ ।
गत आर्थिक वर्षमा मुहानमा पानी संकलन गर्ने टंकी, नहर र पाइपलाइन निर्माण भएको आयोजनालाई यसपाली नहर बनाएर पुर्णता दिइएको उपभोक्ता समितिका सदस्य मोहन कार्कीले बताए । गत वर्ष २१ लाख खर्च भएको आयोजनाका लागि चालु आर्थिक वर्षमा २५ लाख रुपैयाँ बिनियोजन भएको छ ।
यस वर्ष ४०० मिटर नहर निर्माण गरिएको सदस्य कार्कीले बताए । ३० सेन्टिमिटर उचाइ र ३० सेन्टिमिटर चौडाइ भएको पक्कि नहर निर्माण भएको हो । गत वर्ष २८५ मिटर नहर समेत निर्माण भएको थियो ।
प्रतिक्रिया दिनुहोस !
