गोरखा : गत असार १ गतेदेखि सम्पर्कविहीन भएका प्रहरी जवानको खोजीका लागि प्रदेशबाट आएको अनुसन्धान टोलीले कुकुरको मद्दतले प्रहरीको खोजी गरिरहेको छ । टोलीले वेपत्ता भएको ठाउँ तातोपानीदेखि जगत आसपासको क्षेत्रको सोमबारदेखि अनुसन्धान थालेको जिल्ला प्रहरी कार्यालय गोरखाले जनाएको छ ।
सहायक प्रहरी निरीक्षकको कमाण्डमा सातजनाको टोली कुकुरसहित खोजी गर्न आएको हो । उक्त टोलीमा इलाका प्रहरी कार्यालय आरुघाटका प्रहरी निरीक्षक सहितका सुरक्षाकर्मी रहेका छन् ।
जिल्ला प्रहरी कार्यालय गोरखा अन्र्तगतको सामागाउँ प्रहरी चौकीमा कार्यरत प्रहरी जवान मोहनसिंह कुँवर कार्यक्षेत्र जाने क्रममा असार १ गते धार्चे गाउँपालिका वडा नं. ३ र १ आसपासबाट सम्पर्कविहीन भएका थिए ।
उनी सम्पर्कविहीन भएको दिन अत्याधिक वर्षातसँगै उक्त बाटोमा पहिरो बगेकाले पुरिएको आशंकामा यारुबगर क्षेत्रमा खोजीका लागि कुकुरसहितको प्रहरी टोली परिचालन भएको प्रहरी निरीक्षक धर्म अधिकारीले बताए ।
कञ्चनपुर जिल्ला घर भइ हाल उत्तरी गोरखाको सामागाउँ प्रहरी चौकीमा कार्यरत प्रहरी जवान मोहनसिंह कुवँर घर बिदामा गएर फर्कने क्रममा बेपत्ता भएका थिए । असार १ गते उनी खोर्लाबेसीसम्म पुगेको र स्थानीयले भेटेको बताएका थिए । तर त्यसपछिको जगत प्रहरी चौकीसम्म भने उनी नपुगेकाले सोही खण्डमा पहिरोमा पुरिएको वा खोलामा बेपत्ता भएको हुन सक्ने आशंका गरिएको छ ।
प्रतिक्रिया दिनुहोस !
