जनार्दनलाई विश्वप्रकाशको प्रश्न : सरकारको प्रस्तावविरुद्ध मन्त्रीकै असहयोग ?

काठमाडौं : नेपाली कांग्रेसका महामन्त्री विश्वप्रकाश शर्माले सरकारमा बसेर दोहोरो चरित्र नदेखाउन सत्ता गठबन्धनका नेता र मन्त्रीलाई आग्रह गरेका छन् । 

विरामीको कारण देखाएर अमेरिकी सहायता परियोजना एमसीसी टेबल गर्न अस्वीकार गरेका अर्थमन्त्री जनार्दन शर्मातर्फ लक्षित गर्दै शर्माले बिहीबार ट्वीटरमार्फत सरकारमा बसेर सरकारकै प्रस्तावमा असहयोग नगर्न चेतावनी दिएका हुन् । 

‘एमसीसीमा सरकारको प्रस्तावविरुद्ध सरकारकै मन्त्रीको असहयोग हद दर्जाको अराजकता ?’ शर्माले प्रश्न गरेका छन्, ‘कि भनौं गठबन्धनमा छौं, सरकारमा छैनौं l कि सरकारमा रहँदाको मर्यादा पालन गरौं ।’ 

शर्माले ओली नेतृत्वको सरकारले संसदमा दर्ता गरेको एमसीसी प्रस्ताव कांग्रेस नेतृत्वको सरकारले अघि बढाउँदा प्रतिपक्षी दलका नेताको नैतिक जवाफदेहीता पनि खोजिने उल्लेख गरेका छन् । 

उनले आफैले यहाँसम्म पुर्‍याएको एमसीसी परियोजनामा द्वैध चरित्र नदेखाउन उनले सत्ता गठबन्धनका नेता प्रचण्ड र माधव नेपालको समेत ध्यानाकर्षण गराएका छन् ।

‘सडकमा एमसीसीको विरोध गरिरहेको युवाको कुनै दोष छैन । दोषी त ति द्वैध चरीत्र भएका नेताहरू हुन् जो बालुवाटारमा एउटा कुरा गर्छन् बानेश्वरमा अर्को,’ उनले भनेका छन्, ‘अब टुंगो गरौं, क्षणिक लोकप्रियता रोज्ने कि दीर्घकालीन लोकहित ? आवेग र उग्रताले रास्ट्रहरु समृद्ध बनेका छन् कि `जिम्मेवार रास्ट्रवाद´ ले?’