सङ्खुवासभामा मलामी बोकेको ट्याक्टर दुर्घटना, दुईजनाको मृत्यु, ४४ घाइते
असार २४, २०७९ शुक्रबार १६:५२:०
खाँदबारी : संखुवासभाको चैनपुर नगरपालिका–१० मा मलामी गएर फर्किने क्रममा ट्याक्टर दुर्घटना हुँदा दुईजनाको मृत्यु भएको छ ।
खाँदबारी–लेगुवा सडक खण्डको दुमकटामा शुक्रबार दिउँसो ट्याक्टर पल्टिदा मलामीहरु केशव कार्की र गंगाबहादुर तामाङ मृत्यु भएको जिल्ला प्रहरी कार्यालयका डीएसपी लालध्वज सुवेदीले जानकारी दिए ।
दुर्घटनामा ४४ जना घाइते भएका छन् ।
को २ त ३९६१ नम्बरको ट्याक्टर दुर्घटना चैनपुर–१० का २४ वर्षीय तामाङ र चैनपुर–९ का ४६ वर्षीय कार्कीको मृत्यु भएको डीएसपी सुवेदीले बताए ।
घाइतेमध्ये एकजनाको अवस्था गम्भीर रहेको प्रहरीले जनाएको छ ।
खराङबाट मलामीलाई खाजा बोकेर पिलुवा खोलामा गइ दाहा संस्कार गरी पुन: मालामी बोकी फर्कने क्रममा ट्याक्टर दुम्कटामा दुर्घटनामा परेको हो ।
घाइतेको मनकामना सामुदायिक अस्पताल तुम्लिङटार र जिल्ला अस्पताल सङ्खुवासभामा उपचार भइरहेको प्रहरीले जनाएको छ ।
सवारी चालक चैनपुर–१० का ३४ वर्षीय मोहनकुमार तामाङलाई अस्थायी प्रहरी चौकी सभाखोलाले नियन्त्रणमा लिएको जनाएको छ ।
ट्याक्टरको लोडपिन अचानक भाँचिन गइ रोडको बाँयातर्फ पल्टिएको प्रहरीले जनाएको छ । चैनपुर–१० की ९० वर्षीया कौशिला अधिकारीको मलामी गएकाहरु दुर्घटनामा परेका हुन् ।
प्रतिक्रिया दिनुहोस !
