सुदूरपश्चिममा बजेटप्रति सत्ता पक्षकै सांसदको आक्रोश
असार २८, २०७९ मंगलबार १३:२१:०
धनगढी : सुदूरपश्चिममा गठबन्धन सरकारलाई आफैले ल्याएको बजेट पास गर्न हम्मेहम्मे परेको छ । बजेट, मनपरी ढंगले आएको भन्दै सत्ता पक्षकै प्रदेश सभा सदस्यहरु बजेटको विरोधमा उत्रिएका छन् ।
सभामुख अर्जुन बहादुर थापाले, आज ११ बजेका लागि प्रदेश सभाको बैठक बोलाएका थिए । ‘बैठक सञ्चालनका लागि १४ जना प्रदेश सभा सदस्य पुग्नुपर्छ, तर त्यो संख्या नपुगेकाले बैठक आजै ३ बजेसम्मका लागि स्थगित गरिएको छ,' सभामुख थापाले भने ।
सुदूरपश्चिममा सभामुख बाहेक ५० जनाको प्रदेश सभा छ ।
प्रदेश सभाको आजको बैठकमा नेकपा एमाले, जसपा, लोसपाका सांसदहरु उपस्थित भएनन् । सत्ता पक्ष अथवा नेकपा एकीकृत समाजवादीको तर्फबाट प्रमुख सचेतक दुर्गा कुमारी विक बाहेकका प्रदेश सभा सदस्य समेत आएनन् । सत्ता पक्षमै रहेको कांग्रेसका प्रदेश सभा सदसयको पनि अनुपस्थिति रह्यो ।
नेकपा एकीकृत समाजवादीको तर्फबाट आर्थिक मामिलामन्त्री प्रकाशबहादुर रावल स्वयम प्रदेश सभामा उपस्थित भएनन् । त्यसपछि गणपुरक संख्या नपुगेको भन्दै प्रदेश सभा स्थगित गरिएको प्रदेश सभा सचिवालयले जनाएको छ ।
संवैधानिक व्यवस्था अनुसार प्रदेशका आर्थिक मामिलामन्त्री प्रकाश बहादुर रावलले असारको १ गते ३६ अर्व ७४ करोडको बजेट प्रस्तुत गरेका थिए । तर, अहिलेसम्म संसदमा बजेट माथिको छलफल नै सुरु हुन सकेको छैन । सत्ता पक्ष अथवा नेकपा एकीकृत समाजवादीकै प्रदेश सभा सदस्यहरुले समेत आफ्नै पार्टीका मन्त्रीले ल्याएको बजेट प्रति असन्तुष्टी जनाउँदै आएका छन् ।
समाजवादीका प्रदेश सभा सदस्यहरुले आफूहरुले दिएका योजनाहरु बजेटमा समावेश नगरिएको, होटलमा बसेर बजेट बनाएको, योजनामा २० प्रतिशतसम्म कमिसन खाएको जस्ता आरोप लगाउँदै आएका छन । ‘एक/दुई योजना त दिएको थिए, तर त्यो पनि राखिदिएन,' नेकपा एकीकृतकी प्रदेश सभा सदस्य तथा पूर्व भौतिक पूर्वाधार राज्यमन्त्री चुनकुमारी चौधरीले भनिन् ।
सत्तामा रहेको नेकपा माओवादी केन्द्रका प्रदेश सभा सदस्यहरु पनि बजेट बारे दुई समूहमा विभाजित भएका छन् ।
उद्योग वन वातावरण तथा पर्यटन मन्त्री मान बहादुर धामी र नेकपा माओवादी केन्द्रका प्रदेश सभा सदस्य विरमान चौधरी बीच बजेटको छलफलका क्रममा विवाद नै भएको थियो । विरमान चौधरीले कार्य व्यवस्था परामर्स समितिमा आफूलाई नबोलाएको आरोप लगाएका छन् ।
अर्को पटक बसेको कार्य व्यवस्था परामर्श समितिमा नेकपा माओवादी केन्द्रका प्रमुख सचेतक अक्कल रावल र विरमान चौधरीले बजेटको विरोध गरेका थिए । सत्तारुढ नेकपा एकीकृत समाजवादीकै दुई मन्त्रीबाहेकका अधिकांश प्रदेशसभा सदस्यहरू बजेटप्रति असन्तुष्ट छन्।
बजेटमा प्रायः धेरै प्रदेश सभा सदस्यहरुको असन्तुष्टि पछि नेकपा माओवादी केन्द्रले त आफ्ना प्रदेश सभा सदस्यहरुलाई ह्विप जारी गर्दै बजेट पास गर्न र बजेटबारे अनावश्यक टिकाटिप्पणी नगर्न निर्देशन समेत दिएको छ ।
प्रतिक्रिया दिनुहोस !
