गोरखा : मनास्लु हिम पहिरोमा परेका सबैको उद्धार गरिएको छ । मनास्लुको तेस्रो शिविरबाट चौथो शिविर जाँदै गर्दा हिम पहिरोमा पुरिएका आरोहीका १३ जना सहयोगीको मंगलबार बिहान उद्धार गरिएको जिल्ला प्रहरी कार्यालय गोरखाले जनाएको छ ।
मौसम प्रतिकुल हुँदा गएराती तेस्रो शिविरमै राखिएका १० जनालाई अहिले बिहान हेलिकोप्टरबाट उद्धार गरेर सामागाउँसम्म ल्याइएको एसपी केदार खनालले बताए । ‘दुई जनाको हिजै उद्धार गरिएको थियो । अहिले बिहान १० जनाको उद्धार भयो’, एसपी केदार खनालले भने, ‘हिजो दुई र आज चारजना गरेर छ जनालाई काठमाडौं पुर्याइसकिएको छ । अरुलाई पनि काठमाडौँ लाने तयारी भइरहेको छ ।’ संखुवासभाका ४० वर्षीय निमा दोर्जे शेर्पा, संखुवासभाकै २५ वर्षका दावा शेर्पा, दोलखाका ४० वर्षीय फुरिता शेर्पा, दोलखाकै ३७ वर्षका लाक्पा तामाङलाई मंगलबार बिहान सवा आठबजे काठमाडौं लगिएको हो । उनीहरुमध्ये निमा दोर्जे शेर्पा गम्भीर घाइते छन् ।
तीन जनाको अवस्था सामान्य भएकाले हिँडेर तेस्रो शिविरबाट सामागाउँ झरिरहेका उनले बताए । उद्धारका लागि सिम्रिक एयर, हेली एभरेस्ट र कैलाश एयरका तीन हेलिकोप्टरहरु परिचालन गरिएको छ । सोमबार दिउसो १२ बजे हिमपहिरो जाँदा मनास्लु आरोहीका लागि आत्यावश्यकीय सामग्री ओसार्दै गरेका १३ जना सहयोगीहरु पुरिएका थिए । उनीहरुमध्ये एकजनाको मृत्यू भएको छ भने १२ जना घाइते छन् ।
मनास्लु आरोहण गर्न यो सिजनमा पर्यटन विभागबाट ४०४ जना विदेशी आरोहीले अनुमति लिएका छन् । विदेशी आरोही र नेपाली सहयोगी गरी एकहजार जना भन्दा धेरै अहिले मनास्लुका विभिन्न शिविरमा रहेकी पर्यटन विभागकी अधिकृत यशोदा अर्यालले जानकारी दिइन् ।
प्रतिक्रिया दिनुहोस !
