गोरखा : गोरखाको मनास्लु हिमालमा स्की गर्ने क्रममा बेपत्ता भएकी प्रसिद्ध अमेरिकी स्की पर्वतारोही हिलारी नेल्सन मृत अवस्थामा फेला परेकी छन् । गत सोमबारदेखि हराइरहेकी उनलाई बुधबार बिहान मृत अवस्थामा भेटिएको सांग्रिला नेपाल ट्रेक्स प्रालिले जनाएको छ ।
मनास्लु आरोहण गरेर फर्किदा स्की गर्ने क्रममा उनी बेपत्ता भएकी थिइन् ।
उनको शव अहिले मनास्लु बेस क्याम्पमा छ। हेलिकोप्टरमार्फत सामागाउँ ल्याउने तयारी भइरहेको जिल्ला प्रहरी कार्यालय गोरखाका एसपी केदार खनालले जानकारी दिए । सामागाउँमा ल्याएपछि प्रहरी मुचुल्का तयार गरी शव काठमाडौं पठाउने उनले बताए ।
सँगै गएका जिम मोरिसन भने सकुशल आधार शिविरमा फर्कन सफल भएका थिए । हिलारी भने स्की गर्दा मनाङतर्फको क्षेत्रमा हराएकी थिइन् ।
दुर्घटना स्थलबारे अध्ययन गर्न अमेरिकाबाट उनको परिवार आउँदै गरेको सांग्रिला नेपाल ट्रेक्स प्रालिका प्रवन्ध निर्देशक जीवन घिमिरेले जानकारी दिए ।
हेलिकोप्टरबाट दुर्घटनास्थलको अवलोकनका लागि अनुमति लिने चरणमा रहेको घिमिरेले जानकारी दिए ।
प्रतिक्रिया दिनुहोस !
