सप्तरीबाट प्रदेश सभा सदस्यमा जनमत पार्टीका सकिल मियाँ विजयी
मंसिर ८, २०७९ बिहीबार १३:२८:०
राजविराज : सप्तरीको प्रदेश सभा १ (२) मा जनमत पार्टीले थप एक स्थानमा विजय हासिल गरेर जिल्लामा प्रदेश सभाको सङ्ख्या ४ पुर्याएको छ । बिहीबार सार्वजनिक परिणामअनुसार जनमत पार्टीका सकिल मियाँ १६ हजार १६० मतका साथ विजयी भएका छन् । निर्वाचन अधिकृतको कार्यालय प्रतिनिधि सभा क्षेत्र नम्बर १, कञ्चनरुपका अनुसार प्रदेश सभा सदस्यमा मियाँले ६ हजार २७२ मतान्तरले जित हासिल गरेका हुन् ।
मियाँका निकट्तम प्रतिद्वन्द्वी जसपा नेपालका सुदम्बर यादवले ९ हजार ८८८ मत प्राप्त गरे । पाँच दलीय सत्ता गठबन्धनका उम्मेदवार नेपाली कांग्रेसका बद्रीनारायण महात्मानले ६ हजार ६१० मत प्राप्त गरे ।
गत प्रदेश सभाको निर्वाचनमा उक्त क्षेत्रबाट राजपाका नवलकिशोर साहले विजयी हासिल गरेका थिए । उनी अहिले जसपाबाट प्रतिनिधिसभाका उम्मेदवार छन् । प्रतिनिधिसभातर्फ सप्तरी १ मा जसपाका साहले १६ हजार ९३९ मतका साथ अग्रता बढाएका छन् । साहलाई जनमत पार्टीका जयकान्त राउतले १२ हजार ३६३ मतका साथ पछ्याइरहेका छन् ।
सप्तरी १ (१) को प्रदेश सभा सदस्यमा नेकपा (एमाले) का राजकुमार लेखीले १० हजार नौ सय १ मतका साथ अग्रता बढाएका छन् । उनलाई जनमत पार्टीका शिवनन्दन महतोले ७ हजार ८६५ मतका साथ पछ्याइरहेका छन् । गठबन्धनबाट माओवादीका वेचनप्रसाद चौधरीले ५ हजार ५४५ मत प्राप्त गरेका छन् ।
हालसम्म घोषित परिणाम अनुसार सप्तरीमा जनमत पार्टीले १ प्रतिनिधि सभा र ४ प्रदेश सभा सदस्यमा जित निकालेको छ । नेपाली कांग्रेसले १ प्रदेश सभामा जित हासिल गरेको छ । बाँकी प्रतिनिधि सभा १ मा जसपाका नवलकिशोर साह तथा ३ र ४ मा कांग्रेसका क्रमशः दिनेशकुमार यादव र तेजुलाल चौधरीले अग्रता कायम राखेका छन् ।
प्रदेश १ (१) मा नेकपा (एमाले)का राजकुमार लेखी, ४ (१) मा नेकपा (एस) का गोबिन्द बहादुर न्यौपाने र ४ (२) मा स्वतन्त्रका अनिरुद्धकुमार यादवले अग्रता कायम राखेका छन् ।
प्रतिक्रिया दिनुहोस !
