दाङ : दाङको जनसंख्या प्रारम्भिक तथ्यांकभन्दा घटेको छ। राष्ट्रिय जनगणना २०७८ को प्रारम्भिक तथ्यांकभन्दा १ हजार २ सय ९ जनाले कमी आएको हो। १४ महिनाअघि गतवर्ष माघ १३ गते तथ्यांक विभागले सार्वजनिक गरेको प्रारम्भिक विवरणमा दाङको जनसंख्या ६ लाख ७६ हजार २ सय रहेकोमा अन्तिम तथ्यांकमा दाङको जनसंख्या ६ लाख ७४ हजार ९ सय ९३ कायम भएको हो।
अन्तिम तथ्यांकअनुसार दाङमा पुरुषभन्दा महिलाको संख्या बढी रहेको छ। जिल्लामा ३ लाख २० हजार ५ सय ७३ अर्थात् ४७ दशमलव ५ प्रतिशत पुरुष र ३ लाख ५४ हजार ४ सय २० अर्थात् ५२ दशमलव ५ प्रतिशत महिला रहेका छन्। जिल्लामा १० पालिकामध्ये सबैभन्दा बढी जनसंख्या घोराही उपमहानगरपालिमा रहेको छ भने सबैभन्दा कम बंगलाचुली गाँउपालिकामा रहेको छ।
घोराही उपमहानगरपालिकामा २ लाख ५ सय ३० जनसंख्या रहेको छ भने बंगलाचुलीमा २२ हजार ३ सय ७३ रहेको छ। तुलसीपुर उपमहानगरपालिकामा १ लाख ७९ हजार ७ सय ५५, शान्तिनगर गाउँपालिकामा २७ हजार ६ सय ४१, बबई गाउँपालिकामा ३० हजार ९ सय ६८, दंगिशरण गाउँपालिकामा ३२ हजार ६ सय ६८ जनसंख्या रहेको छ। यस्तै लमही नगरपालिकामा ५९ हजार ५०, राप्ती गाउँपालिकामा ५२ हजार १ सय २३, गढवा गाउँपालिकामा ४५ हजार ८ सय ९८ र राजपुर गाउँपालिकामा २८ हजार ३ सय ४६ जनसंख्या रहेको छ।
सल्यानको जनसंख्या २ लाख ३८ हजार
सल्यानको जनसंख्या तीन लाखभन्दा कम रहेको छ। राष्ट्रिय जनगणना २०७८ को विवरणमा सल्यानको जनसंख्या २ लाख ३८ हजार ५ सय १५ कायम भएको हो। अन्तिम नतिजाअनुसार जिल्लामा पुरुषको तुलनामा महिलाको संख्या धेरै रहेको छ। जिल्लामा १ लाख २३ हजार ५३३ अर्थात् ५ दशमलव ८ प्रतिशत महिला रहेका छन् भने ४८ दशमलव २ प्रतिशत अर्थात् १ लाख १४ हजार ९८२ पुरुषको संख्या रहेको छ। १० पालिकामध्ये सबैभन्दा बढी शारदा नगरपालिकामा र सबैभन्दा कम ढोरचौर गाउँपालिकामा जनसंख्या रहेको छ। शारदा नगरपालिकामा ३४ हजार ६ सय ६३ रहेको छ भने ढोरचौर गाउँपालिकामा १३ हजार १ सय २७ रहेको छ।
यस्तै बागचौर नगरपालिकामा ३४ हजार २१, कालिमाटी गाउँपालिकामा २२ हजार २ सय ६, छत्रेश्वरी गाउँपालिकामा २१ हजार २ सय ४२, बनगाड कुपिण्डे नगरपालिकामा ३२ हजार ९ सय ४० कायम रहेको छ। यस्तै कपुरकोट गाउँपालिकामा १७ हजार ५ सय २६, त्रिवेणी गाउँपालिकामा १६ हजार ६ सय ६४, दार्मा गाउँपालिकामा २० हजार ४१ र कुमाख गाउँपालिका २४ हजार ८ सय ५९ कायम रहेको छ।
प्रतिक्रिया दिनुहोस !
