नयाँ दिल्ली : भारतको महाराष्ट्रको इर्शलवाडी गाउँमा पहिरो गएको चार दिन बितिसक्दा पनि ८२ जना अझै बेपत्ता छन्। शनिबार भग्नावशेषबाट थप चार जनाको शव निकालेको थियो । दुर्घटनामा मृत्यु हुनेको संख्या २६ पुगेको छ ।
खोज र उद्धार अभियान जारी रहेको र स्थानीय टोलीसहित एनडीआरएफका चार टोली खोजी कार्यमा संलग्न छन्। यवतमाल जिल्लामा वर्षाका कारण बाढीमा फसेका ४५ जनाको उद्धार गर्न वायुसेनाका दुई हेलिकप्टर परिचालन गरिएको छ ।
शनिबार गुजरातका धेरै सहरमा भारी वर्षा भएको थियो । नवसारीमा वर्षाका कारण एकजना बेपत्ता भएका छन् ।
वलसाड, भावनगर, देवभूमि द्वारका, दमन र दादरा नगर हवेलीका लागि रेड अलर्ट जारी गरिएको छ। अहमदाबाद, आनन्द, भरुच, बनासकांठा, साबरकन्ठा, अमरेली, जामनगर, गिर सोमनाथ र कच्छका लागि ओरेन्ज अलर्ट जारी गरिएको छ। सुरेन्द्रनगर, दाहोद, जुनागढ, राजकोट, बोटाड, बडोदरा, सुरत र नवसारीका लागि एलो अलर्ट जारी गरिएको छ।
अर्कोतर्फ दिल्लीमा यमुना नदीको पानीको सतह फेरि बढेको छ । आइतबार बिहान ७ बजे पानीको सतह २०५ दशमलव ८१ मिटर मापन गरिएको थियो । शनिबार पानीको सतह खतराको चिन्ह (२०५ दशमलव ३३ मिटर) वरपर रहेको थियो । पानी घटेपछि घर फर्किएका अधिकांश शनिबार राहत शिविरमा फर्किएका छन् । दैनिक भास्कर
प्रतिक्रिया दिनुहोस !
