गुलरिया :दुई दिनदेखि परेको अविरल वर्षाका कारण बबई नदीमा पानीको सतह बढेको छ । नदीमा पानीको बहाव बढेसँगै नदी तटीय क्षेत्रका बासीन्दालाई सर्तकताको चेतावनी दिइएको छ ।
न्युन चापीय मनसुन नेपाल नजिकै दक्षिणतर्फ रहेकाले नेपालभरी वर्षा भैरहेकोले सोमबारसम्म निरन्तरता रहिरहने मौसम पूर्वानुमान महाशाखाले जनाएको छ । हाईड्रोलोजीका अनुसार २४ घण्टामा बर्दियाका ३ स्थानमा भारी वर्षा भएको छ । सबैभन्दा बढी बबईको रम्भापुर स्टेशन २२० दशमलव ८ मिलिमिटर, रानीजरुवा नर्सरी १५३ दशमलव २ मिलिलिटर र बबई सानोश्री चेपाङमा १५७ दशमल २ मिलिमिटर वर्षा भएको छ । २४ घण्टामा १४० मिलिमिटर वर्षालाई खतरनाक चेतावनीको रुपमा लिइन्छ ।
दाङ, सल्यान र बर्दियामा पानी परेपछि बबई नदीको बहाव बढ्ने गरेको छ । बबई चेपाङमा ५ दशमलव ५० मिटर पानीको सतहलाई चेतावनी र ६ दशमलव ८० मिटरलाई खतराको तह मानिन्छ । बबई नदीको गुलरिया स्थित भादा पुलमा ७ मिटर पानीको सतहलाई चेतावनी र ८ मिटरलाई खतराको तह बुझिन्छ । यतिखेर बबई चेपाङमा चेतावनी तह ५ दशमलव ५० र बबई भादा पुलमा पानीको सतह चेतावनी तह ७ मिटर नाघेको छ । वर्षा नरोकिंदा नदीमा पानी बढ्ने क्रम जारी रहेकोले बबई नदीले खतराको तह पुग्ने अनुमान गरिएको छ ।
अत्याधिक वर्षाका कारण बर्दियाको बारबर्दिया नगरपालिका वडा नम्वर ८ मा ४३ घर डुवानमा परेको सहायक प्रमुख जिल्ला अधिकारी मोहन प्रसाद अर्यालले बताएका छन् । अविरल वर्षा भैरहेको र नदी लगायत शाखा नदीहरुमा पानीको सतह बढीरहेकाले तटीय क्षेत्रमा बसोवास गर्ने स्थानीयहरुलाई सर्तकता अपनाउन सूचना गरेका छौं । जिल्ला विपद ब्यवस्थापन समितिले जोखिमका बेला उद्धार गर्न मोटरवोट लगायतका उद्धार सामाग्रीसहित सुरक्षाकर्मीहरुलाई तयारी अवस्थामा राखिएको उनले जानकारी दिए ।
प्रतिक्रिया दिनुहोस !
